ڈاکٹر رتھ فاو کا نام پاکستان میں جذام کیخلاف جدوجہد کی علامت بن چکا ہے، وزیراعلیٰ سندھ

کراچی (9 فروری): وزیراعلیٰ سندھ سید مراد علی شاہ نے میری ایڈیلیڈ لیپروسی سینٹر (ایم اے ایل سی) کی سات دہائیوں پر محیط انسان دوست خدمات کو سراہتے ہوئے کہا کہ ادارے کا پلاٹینم جوبلی اور 73واں عالمی یومِ جذام منانا شفا، امید اور انسانیت کو خراجِ تحسین ہے۔

میریئٹ ہوٹل میں منعقدہ تقریب میں جرمنی کے قونصل جنرل، ایم اے ایل سی کے چیف ایگزیکٹو آفیسر (سی ای او) مارون لوبو اور دیگر شخصیات نے شرکت کی۔

تقریب سے خطاب کرتے ہوئے وزیراعلیٰ نے کہا کہ ایم اے ایل سی کا سفر جذام پر قابو پانے کے پروگرام سے ایک نمایاں انسان دوست ادارے تک پہنچنا قابلِ ستائش ہے۔ انہوں نے کہا کہ ادارے نے ان افراد کا ساتھ دیا جو کبھی سماجی طور پر نظر انداز کیے جاتے تھے اور انہیں ہمدردی، وقار اور غیر متزلزل عزم کے ساتھ خدمات فراہم کیں۔

ڈاکٹر رتھ فاؤ کو زبردست خراجِ عقیدت پیش کرتے ہوئے وزیراعلیٰ نے کہا کہ ان کا نام پاکستان میں جذام کے خلاف جدوجہد کی علامت بن چکا ہے۔ انہوں نے ڈاکٹر فاؤ سے وابستہ مذہبی جماعت "ڈاٹرز آف دی ہارٹ آف میری" کے کردار کو سراہا جس نے ایم اے ایل سی کی پائیدار میراث کو تشکیل دینے میں اہم کردار ادا کیا۔ انہوں نے 1962 سے جرمنی کے عوام کی مسلسل انسان دوست معاونت پر بھی اظہارِ تشکر کیا اور ڈاکٹر فاؤ کو سرحدوں سے بالاتر ہمدردی کی مضبوط علامت قرار دیا۔

مراد علی شاہ نے نیورو ڈیولپمنٹل عوارض میں مبتلا بچوں کے لیے جامع ترقی کے اقدامات اور جامع تعلیم کے فروغ کے لیے ایم اے ایل سی کی توسیع کا خیرمقدم کیا۔ انہوں نے کہا کہ یہ مستقبل بین نقطۂ نظر موجودہ سماجی ضروریات کے ادراک کو ظاہر کرتا ہے۔

ادارے اور حکومت کے درمیان طویل اشتراک کا ذکر کرتے ہوئے وزیراعلیٰ نے کہا کہ ایم اے ایل سی ان قدیم غیر سرکاری تنظیموں (این جی اوز) میں شامل ہے جو عوامی و نجی شراکت داری کے ماڈل کے تحت کام کر رہی ہیں، جو باہمی اعتماد، ساکھ اور یقین کی عکاسی کرتا ہے۔

ایم اے ایل سی کی جانب سے متعارف کرائی گئی جذام کے خاتمے کی حکمت عملی 2024 تا 2030 کا حوالہ دیتے ہوئے وزیراعلیٰ نے اسے قومی مقصد قرار دیا اور اس کے اہداف کے حصول کے لیے حکومت سندھ کی مکمل معاونت کا یقین دلایا۔ انہوں نے بین الاقوامی تعاون، بالخصوص جدید ٹیکنالوجی اور عالمی مہارت کے استعمال کو مشن کی کامیابی کے لیے ناگزیر قرار دیا۔

وزیراعلیٰ نے ایم اے ایل سی کی پوری ٹیم کو مبارکباد دیتے ہوئے کہا کہ ادارہ سات دہائیوں سے مسلسل غریب اور پسماندہ طبقات، خصوصاً دور دراز علاقوں میں رہنے والے افراد کی خدمت کر رہا ہے۔ انہوں نے اس بات پر اطمینان کا اظہار کیا کہ ڈاکٹر رتھ فاؤ کی تربیت اور رہنمائی سے تیار ہونے والی مقامی ٹیم انہی جذبے، ہمدردی اور معیار کے ساتھ ان کی میراث کو آگے بڑھا رہی ہے۔

وزیراعلیٰ نے اپنے خطاب کے اختتام پر ایم اے ایل سی کی انسانیت کی خدمت کے اس عظیم مشن میں مزید کامیابی کے لیے نیک خواہشات کا اظہار کیا۔