وڏي وزير مراد علي شاهه جي صدارت ۾ اجلاس، گهوٽڪي-ڪنڌڪوٽ پل جو ڪم 2025 ۾ ٻيهر شروع، 2026 تائين مڪمل ڪرڻ جو فيصلو

Posted on: 02 Nov 2025 Tags:

ڪراچي (28 آڪٽوبر): سنڌ جي وڏي وزير سيد مراد علي شاهه جي صدارت ھيٺ هڪ اجلاس ٿيو جنهن ۾ هن ورڪس اينڊ سروسز کاتي کي هدايت ڪئي ته گھوٽڪي-ڪنڌڪوٽ پل تي تعميراتي ڪم نومبر 2025 تائين ٻيهر شروع ڪيو وڃي ۽ منصوبي کي 2026 تائين مڪمل ڪيو وڃي۔ اجلاس وزيراعليٰ هائوس ۾ ٿيو جنهن ۾ گهرو وزير ضياءُ الحسن لنجار، ورڪس اينڊ سروس جو وزير علي حسن زرداري، وڏي وزير جو خاص مددگار سيد قاسم نويد، چيف سيڪريٽري آصف حيدر شاهه، آءِ جي غلام نبي ميمڻ، گهرو سيڪريٽري اقبال ميمڻ، وڏي وزير جو پرنسپل سيڪريٽري آغا واصف، سيڪريٽري ورڪس نواز سوهو ۽ سيڪريٽري ٽرانسپورٽ ۽ ڊائريڪٽر جنرل پبلڪ پرائيويٽ پارٽنرشپ يونٽ اسد ضامن سميت ٻيا عملدار پڻ موجود هئا۔ وڏي وزير چيو ته درياءِ سنڌ تي تعمير ٿيندڙ هي پل پبلڪ پرائيويٽ پارٽنرشپ تحت هڪ اهم منصوبو آهي جيڪو گھوٽڪي ۽ ڪنڌڪوٽ کي پاڻ ۾ ملائيندو ۽ سنڌ، پنجاب ۽ بلوچستان ۾ رابطن کي وڌيڪ مضبوط ڪندو۔ اجلاس دوران وڏي وزير ورڪس اينڊ سروسز کاتي کي هدايت ڪئي ته تعميراتي سرگرميون نومبر 2025 تائين شروع ڪيون وڃن ۽ منصوبي کي 2026 تائين مڪمل ڪيو وڃي جيڪا 2028 واري اصل آخري تاريخ کان ڪافي اڳ آهي۔ هن چيو ته هي پل مٿين سنڌ جي ضلعن ۾ اهم رابطو فراهم ڪندو ۽ واپار، ٽرانسپورٽ ۽ رابطن جا نوان در کوليندو۔ سڀئي لاڳاپيل ادارا ڪم جي رفتار وڌائن ۽ پاڻ ۾ هم آهنگي برقرار رکن ته جيئن رهيل رڪاوٽون ختم ڪري سگهجن۔

منصوبي جون تفصيلون

درياءِ سنڌ تي تعمير ٿيندڙ هي پل گھوٽڪي کي ڪنڌڪوٽ سان ملائڻ لاءِ ٺاهيو پيو وڃي۔ منصوبو ورڪس اينڊ سروسز کاتي پاران پبلڪ پرائيويٽ پارٽنرشپ تحت مڪمل ڪيو پيو وڃي۔ پل جي ڪل ڊيگهه 12.15 ڪلوميٽر آهي جنهن ۾ لاڳاپيل روڊ به شامل آهن، گھوٽڪي طرف 10.40 ڪلوميٽر ۽ ڪنڌڪوٽ طرف 8.10 ڪلوميٽر۔ ٿل لنڪ روڊ جي ڊيگهه 4.55 ڪلوميٽر آهي۔ هي پل پاڪستان جي ڊگهن ترين دريائي پلن مان هڪ هوندي جيڪا سنڌ، پنجاب ۽ بلوچستان جي وچ ۾ سڌو سنئون زميني رابطو بهتر بڻائيندي۔

ترقي ۽ موجوده صورتحال

بريفنگ موجب گھوٽڪي واري پاسي روڊ تي 83 سيڪڙو، ڪنڌڪوٽ واري پاسي روڊ تي 72 سيڪڙو ۽ درياءِ سنڌ تي مرڪزي پل جي جوڙجڪ تي 16.5 سيڪڙو ڪم مڪمل ٿي چڪو آهي۔ 732 مان 379 پائلز، 360 شافٽس، 115 ٽرانسومز ۽ 438 بيئرنگ پلنتھ تعمير ڪيا ويا آهن۔ تعميراتي ڪم اڳ ۾ ٻوڏ ۽ سيڪيورٽي سبب روڪيو ويو هو۔ ڪم 2024 جي شروعات ۾ ٻيهر شروع ٿيو پر ٻوڏ واري موسم دوران عارضي طور بند ڪيو ويو۔ وڏي وزير هدايت ڪئي ته هاڻي جڏهن ٻوڏ وارو موسم ختم ٿي ويو آهي ته سڀ ادارا بنا رڪاوٽ ڪم جاري رکن ۽ منصوبي لاءِ فول پروف سيڪيورٽي يقيني بڻائن۔

زمين جي حصول بابت

وڏي وزير کي ٻڌايو ويو ته گھوٽڪي ۽ ڪنڌڪوٽ ٻنهي حصن لاءِ زمين جو حصول تقريباً مڪمل ٿي چڪو آهي۔ گھوٽڪي لاءِ 504 ملين رپيا ۽ ڪنڌڪوٽ لاءِ 380 ملين رپيا لاڳاپيل ضلعن جي لينڊ اڪوزيشن آفيسرن کي منتقل ڪيا ويا آهن۔ البت زمين مالڪن سان لاڳاپيل قانوني پيچيدگين سبب ادائيگين ۾ دير ٿي رهي آهي۔ مراد علي شاهه ڊپٽي ڪمشنرن کي هدايت ڪئي ته ادائيگين جو عمل تيز ڪيو وڃي ۽ زمين جي معاوضي سان لاڳاپيل سمورا التواءُ ھيٺ معاملا فوري طور حل ڪيا وڃن۔ هن چيو ته زمين مالڪن کي سندن حق شفاف ۽ وقت سر ڏنا وڃن ڇو⁠تہ عوامي مفاد وارا منصوبا انتظامي سستيءَ سبب متاثر نه ٿيڻ گهرجن۔

سيڪيورٽي انتظامات

وڏي وزير زور ڏنو ته منصوبي جي هموار پيشرفت لاءِ قانون لاڳو ڪندڙ ادارن جي موجودگي ضروري آهي۔ هن وقت پاڪستان رينجرز هڪ مرڪزي بيرڪ ۽ هڪ چيڪ پوسٽ تي درياءِ سنڌ جي ڪناري تي مقرر آهي جڏهن ⁠تہ ضلعي پوليس گھوٽڪي ۾ ٽن ۽ ڪشمور-ڪنڌڪوٽ ۾ لڳ ڀڳ 40 اهلڪارن کي اٺ چيڪ پوسٽن تي مقرر ڪيو آهي۔ مراد علي شاهه گهرو کاتي کي هدايت ڪئي ته رينجرز ۽ پوليس جي ڊيوٽي 24 ڪلاڪ جي بنياد تي وقفي وقفي سان وڌائي وڃي ۽ ڊويزنل ڪمشنرن ۽ ڊي آءِ جيز تي مشتمل مانيٽرنگ ڪميٽيون ٺاهي وڃن جيڪي هفتيوار بنياد تي سيڪيورٽي ۽ تعميراتي اڳڀرائي جو جائزو وٺن۔ وڏي وزير سنڌ گھوٽڪي-ڪنڌڪوٽ پل جي وقت سر مڪمل ٿيڻ لاءِ پنهنجي عزم جو اظهار ڪندي چيو ته هي منصوبو مٿين سنڌ جي معيشت جو رخ بدلائيندو۔ هن زور ڏنو ته منصوبي کي رفتار، هم آهنگي ۽ معيار سان مڪمل ڪيو وڃي۔

Back