وڏي وزير پاران اين آءِ سي وي ڊي جي ڪارڪردگي، مالي صورتحال ۽ بهتري لاءِ مستقبل جي منصوبن جو جائزو

وڏي وزير پاران اين آءِ سي وي ڊي جي ڪارڪردگي، مالي صورتحال ۽ بهتري لاءِ مستقبل جي منصوبن جو جائزو

ڪراچي (28 مارچ): سنڌ جي وڏي وزير سيد مراد علي شاهه نيشنل انسٽيٽيوٽ آف ڪارڊيو ويسڪيولر ڊزيز (NICVD) بورڊ جي اجلاس جي صدارت ڪندي اداري جي ڪارڪردگي، مالي صورتحال ۽ بهتري لاءِ مستقبل جي منصوبن جو جائزو ورتو. اجلاس وزيراعليٰ هائوس ۾ منعقد ٿيو جنهن ۾ وزير صحت ڊاڪٽر عذرا پيچوهو، ميئر ڪراچي مرتضيٰ وهاب، ايم پي ايز سعديه جاويد ۽ رخسانه پروين، پرنسپل سيڪريٽري آغا واصف، سيڪريٽري ناڻو فياض جتوئي، سيڪريٽري صحت ريحان بلوچ، پروفيسر شاهد سميع، مشتاق ڇاپرا، ايگزيڪيوٽو ڊائريڪٽر پروفيسر طاهر صغير، ڪي سي سي آءِ جو صدر جاويد بلواڻي ۽ ٻين لاڳاپيل عملدار شرڪت ڪئي. اجلاس ۾ وڏي وزير گذريل اجلاس جي منٽن جي منظوري ڏني ۽ 2024 ۾ اين آءِ سي وي ڊي جي ڪارڪردگي تي تفصيلي بريفنگ ورتي جنهن دوران اداري جي نيٽ ورڪ ۾ رڪارڊ 13 لک 87 هزار ۽ 584 مريضن جو علاج ڪيو ويو. وڏي وزير کي بريفنگ ڏيندي اين آءِ سي وي ڊي جي ايگزيڪيوٽو ڊائريڪٽر پروفيسر طاهر صغير چيو ته 2024 ۾ اداري ڪيترائي ڏکيا دل جا آپريشن ڪيا جن ۾ 9925 پرائمري پرڪيوٽنيئس ڪورونري انٽروينز (PCI)، 3859 پرائمري انويسو پروسيجر، 760 اليڪٽيو اينجيوگرافي، 18017 ڪورونري اينجيوگرافي، 2061 اوپن هارٽ سرجري، 75 اسٽروڪ انٽروينز، 1691 پيڊياٽرڪ انٽروينز، 1424 پيڊياٽرڪ ڪارڊيڪ سرجري، 291 پي ٽي ايم سي پروسيجر ۽ 29 ٽي اي وي آءِ پروسيجر شامل آهن. نئون او پي ڊي ۽ پيڊياٽرڪ بلاڪ: وڏي وزير مراد علي شاهه هدايت ڪئي ته اين آءِ سي وي ڊي ۾ نئون آئوٽ پيشنٽ ڊپارٽمينٽ (OPD) بلاڪ جولاءِ يا آگسٽ 2025 تائين مڪمل ڪيو وڃي. هي بلاڪ مريضن جي وڌندڙ تعداد کي سنڀالڻ لاءِ هڪ ارب رپين جي لاڳت سان ٺاهيو پيو وڃي. ان کان علاوه عطيو ڏيندڙن جي مدد سان هڪ خانگي وارڊ ۽ هڪ نئون ڪورونري ڪيئر يونٽ پڻ قائم ڪيو پيو وڃي. وڏي وزير کي اهو پڻ ٻڌايو ويو ته مخير حضرات جي سهڪار سان مريضن جي سنڀال ڪندڙن لاءِ سيٽن جو بندوبست ڪيو پيو وڃي. وڏي وزير کي ٻڌايو ويو ته 300 بسترن تي مشتمل هڪ نئون پيڊياٽرڪ يونٽ تعمير هيٺ آهي. سهولت ۾ ست اضافي ماڙ سميت گرائونڊ فلورهوندا جن ۾ 300 بسترا، پنج آپريٽنگ ٿيٽر، چار ڪيٿيٽرائيزيشن ليب ۽ هڪ هائبرڊ ليب شامل آهن جڏهن ته سي ٽي ۽ ايم آر آءِ جون سهولتون پڻ فراهم ڪيون وينديون. هي يونٽ ٻارن جي دل جي بيمارين جي جديد خدمتن جي مڪمل رينج فراهم ڪندو. وڏي وزير صحت کاتي کي هدايت ڪئي ته موجوده مالي سال جي آخر تائين گرائونڊ فلور کي فعال بڻايو وڃي. مالي مسئلا: وڏي وزير کي ٻڌايو ويو ته اين آءِ سي وي ڊي جو ساليانو بجيٽ 9 ارب رپيا آهي پر ادارو 2 ارب رپين جي مالي خساري کي منهن ڏئي رهيو آهي جنهن تي وڏي وزير چيو ته هلندڙ مالي سال لاءِ اين آءِ سي وي ڊي ۽ ايس آءِ سي وي ڊي جو گڏيل بجيٽ 20 ارب رپيا آهي. انتظامي معاملن کي بهتر بڻائڻ ۽ مالي مسئلن کي حل ڪرڻ لاءِ وڏي وزير مراد علي شاهه اين آءِ سي وي ڊي ۽ ايس آءِ سي وي ڊي جي ضم جي منظوري ڏني. هن چيو ته هي انضمام نه رڳو بجيٽ خساري کي پورو ڪندو پر خرچن ۾ بچت کي پڻ يقيني بڻائيندو. هن وڌيڪ چيو ته هن قدم مان بچيل فنڊ اين آءِ سي وي ڊي جي بقايا رَهتن جي ادائيگي لاءِ استعمال ڪري سگهجن ٿا. وڏي وزير خاطري ڪرائي ته جيڪڏهن اضافي مالي مدد جي ضرورت پوندي ته حڪومت ان خال کي پورو ڪندي تنهن هوندي به هن اين آءِ سي وي ڊي جي مالي ضرورتن جو جائزو وٺڻ ۽ ضرورت پوڻ تي فنڊ جو بندوبست ڪرڻ لاءِ سيڪريٽري ناڻي فياض جتوئي جي سربراهي ۾ هڪ ڪميٽي جوڙي آهي. ڀرتين تي پابندي: اجلاس ۾ نشاندهي ڪئي وئي ته اين آءِ سي وي ڊي ۾ ضرورت کان وڌيڪ عملو آهي جنهن تي وڏي وزير هدايت ڪئي ته وڌيڪ ڀرتين تي ايندڙ حڪم ​​تائين پابندي رهندي. هن وزير صحت ڊاڪٽر عذرا فضل پيچوهو کي هدايت ڪئي ته اضافي عملي ۽ ٻين ملازمن کي جن ۾ ڊاڪٽر به شامل آهن، نئين قائم ٿيل اين آءِ سي وي ڊي ميونسپلٽي ڏانهن منتقل ڪيو وڃي ته جيئن افرادي قوت جي مناسب ورڇ کي يقيني بڻائي سگهجي. مراد علي شاهه وزير صحت کي هدايت ڪئي ته اين آءِ سي وي ڊي ۽ ايس آءِ سي وي ڊي جي ضم لاءِ هڪ بزنس پلان تيار ڪيو وڃي جيڪو ٽن مهينن اندر مڪمل ڪيو وڃي. هن عمل ۾ هڪ پروفيشنل ڪنسلٽنٽ جي مدد وٺڻ گهرجي. هن وڌيڪ چيو ته اداري جي آپريشنل ڪارڪردگي ۽ مالي استحڪام کي بهتر بڻائڻ لاءِ ايندڙ مالي سال ۾ اين آءِ سي وي ڊي لاءِ هڪ نئون ڪاروباري ماڊل متعارف ڪرايو ويندو. وڏي وزير پنهنجي ڳالهه کي اهو چئي ختم ڪيو ته انهن اسٽريٽجڪ سڌارن ذريعي سنڌ حڪومت جو مقصد ملڪ جي سڀ کان وڏي ڪارڊيالاجي انسٽيٽيوٽ جي مالي استحڪام کي يقيني بڻائڻ ۽ دل جي علاج جي سهولتن جي معيار کي وڌيڪ بهتر بڻائڻ آهي.