وڏي وزير سيد مراد علي شاهه صوبي ۾ پوليو جي خاتمي لاءِ هفتيوار مهم (21 کان 27 اپريل) جو افتتاح ڪري ڇڏيو

وڏي وزير سيد مراد علي شاهه صوبي ۾ پوليو جي خاتمي لاءِ هفتيوار مهم (21 کان 27 اپريل) جو افتتاح ڪري ڇڏيو

ڪراچي (21 اپريل) سنڌ جي وڏي وزير سيد مراد علي شاهه صوبي ۾ پوليو جي خاتمي لاءِ هڪ هفتيوار مهم (21 اپريل کان 27 اپريل) جو افتتاح ڪري ڇڏيو. ان موقعي تي هن وزيراعليٰ هائوس ۾ ٻارڙن کي پوليو جا ڦڙا پياريا ۽ حڪومت جو اهو مؤقف ورجايو ته هو هن معذور ڪندڙ بيماري جي مڪمل خاتمي لاءِ پرعزم آهي. افتتاحي تقريب ۾ وزير صحت و ڀلائي ڊاڪٽر عذرا فضل پيچوه، انسپيڪٽر جنرل پوليس غلام نبي ميمڻ، ڪميشنر ڪراچي حسن نقوي، سيڪريٽري صحت ريحان بلوچ، ايمرجنسي آپريشن سينٽر (اي او سي) سنڌ جي صوبائي ڪوآرڊينيٽر ارشاد علي سوڍڙ، روٽري جو عزيز ميمڻ، اعليٰ سرڪاري عملدار ۽ بين الاقوامي شراڪتدار تنظيمون—عالمي ادارو صحت (ڊبليو ايڇ او)، يونيسف، بل ۽ ميلينڊا گیٹس فاؤنڈیشن (بي ايم جي ايف) جي نمائندگين شرڪت ڪئي. ان موقعي تي وڏي وزير چيو ته هن مهم جو مقصد سنڌ ۾ پنجن سالن کان گهٽ ڄمار وارن هڪ ڪروڙ ڇهه لک کان وڌيڪ ٻارڙن کي پوليو جا ڦڙا پيارڻ آهي جن ۾ فقط ڪراچي ۾ 27 لک 60 هزار ٻار شامل آهن. هي مهم 69724 تربيت يافته فرنٽ لائن ورڪرن جي هڪ وڏي ٽيم جي ذريعي هلائي ويندي، جيڪي گھرن، اسڪولن، شاپنگ مالن ۽ مسافرخانن (ٽرانزٽ پوائنٽ) تي ٻارڙن کي ويڪسينيشن فراهم ڪندا ته جيئن ڪوبه ٻار ڦڙا پيئڻ کان محروم نه رهي. وڏي وزير شديد گرمي باوجود فرنٽ لائن ورڪرن جي جذبي کي ساراهيو ۽ چيو ته سندن اڻٿڪ محنت جي اعتراف ۾ حڪومت پاران پاڻي، او آر ايس جي پيڪٽن ۽ ٻين ضروري شين جي فراهمي ڪئي پئي وڃي ته جيئن اهي سخت گرمي ۾ تازو ۽ صحت مند رهي سگهن. هن اهو پڻ ٻڌايو ته ويڪسينيشن ٽيمن جي سيڪيورٽي ۽ مهم جي رواني کي يقيني بنائڻ لاءِ سنڌ ۾ 25360 پوليس اهلڪار تعينات ڪيا ويا آهن. والدين ۽ ٻارن جي سرپرستن سان پرزور اپيل ڪندي وڏي وزير مراد علي شاهه زور ڏنو ته پوليو ويڪسينيشن ٽيمن جي آجيان ڪئي وڃي ڇوته پنجن سالن کان گهٽ ڄمار هر ٻار کي ڦڙا پيارڻ انتهائي ضروري آهي. هن چيو ته پوليو جو ڪو علاج نہیں رڳو ويڪسينيشن ئي اسان جي ٻارڙن کي سڄي عمر معذوري کان بچائي سگهي ٿي. ويڪسينيشن بابت خدشن تي ڳالهائيندي هن عوام کي يقين ڏيارو ته هي اهائي پوليو ويڪسين آهي جنهن سان دنيا جي ڪيترن ئي ملڪن مان وائرس جو خاتمو ڪيو ويو آهي. هن وضاحت ڪئي ته هي اهائي ويڪسين آهي جيڪا حج ۽ عمري تي ويندڙ زيارتين کي ڏني وڃي ٿي ۽ عام طور تي پرائيويٽ ڪلينڪن ۽ اسپتالن ۾ ٻارڙن جي ماہر ڈاکٹر پاران تجويز ڪئي ويندي آهي. وڏي وزير مراد علي شاهه ان ڳالهه تي زور ڏيندي چيو ته جيڪڏهن ڪو ٻار تازو ئي ويڪسين وٺي چڪو آهي ته به هن مهم دوران ٻيهر ڦڙا پيارڻ بلڪل محفوظ ۽ ضروري آهي. هن وڌيڪ چيو ته حڪومت ان ڳالهه کي يقيني بڻائي رهي آهي ته ڪولڊ چين (ويڪسين کي ٿڌو رکڻ جو نظام) سختي سان برقرار رکيو وڃي ته جيئن ويڪسين مؤثر ۽ طاقتور حالت ۾ هر ٻار تائين پهچي سگهي. وڏي وزير پنهنجي خطاب جو اختتام ٻڌيءَ ۽ اميد جي هڪ پُراثر پغام سان ڪيو. هن چيو ته پوليو جو خاتمو هڪ گڏيل عزم جو تقاضو ڪري ٿو اڳواڻن کان وٺي فرنٽ لائن ورڪرن، برادرين کان وٺي هر گهريلو خاندان تائين. سنڌ هن مشن ۾ متحد آهي. اچو ته گڏجي هر ٻار جي حفاظت ۽ ايندڙ نسلن لاءِ صحت مند ۽ محفوظ مستقبل کي يقيني بڻايون. وڏي وزير مراد علي شاهه چيو ته اسان سڀ گڏجي پوليو جو خاتمو ڪري سگهون ٿا ۽ اها مهم تيستائين جاري رکڻ گهرجي جيستائين هي مقصد حاصل نه ٿئي. هن 21 کان 27 اپريل 2025 تائين جاري رهندڙ انسداد پوليو مهم جو باضابطه آغاز ڪيو جنهن جو هدف سنڌ ۾ هڪ ڪروڙ ڇهه لک کان وڌيڪ ٻارڙن کي ويڪسينيشن ڏيڻ آهي جن مان 27 لک 60 هزار رڳو ڪراچي ۾ شامل آهن. وزير صحت ڊاڪٽر عذرا فضل پيچوهو چيو ته ماحولياتي نمونن مان ظاهر ٿئي ٿو ته وائرس اڃا موجود آهي. ويڪسينيشن ئي اسان جي هڪ واحد تحفظ آهي ۽ اسان کي هن مهم کي وڌيڪ مضبوط عزم سان جاري رکڻ گهرجي. شهري عورتن کي درخواست ڪئي وئي آهي ته پوليو ٽيمن سان مڪمل تعاون ڪن. جيڪڏهن ڪنهن گھر ۾ پنجن سالن کان گهٽ ڄمار جو ٻار پوليو جا ڦڙا پينڻ کان رهجي ويو آهي ته گهر جو ڪوبه واسي 1166 تي ڪال ڪري يا 7776545-0346 تي واٽس ايپ ڪن.