وزیراعلیٰ سندھ کی چیئرمین وزیراعظم یوتھ پروگرام اور وفاقی وزیر مذہبی امور سے الگ الگ ملاقاتیں

وزیراعلیٰ سندھ کی چیئرمین وزیراعظم یوتھ پروگرام اور وفاقی وزیر مذہبی امور سے الگ الگ ملاقاتیں

وزیراعلیٰ سندھ کی چیئرمین وزیراعظم یوتھ پروگرام اور وفاقی وزیر مذہبی امور سے الگ الگ ملاقاتیں 

وزیراعلیٰ کا سندھ کے نوجوانوں کو بااختیار بنانے اور فلاح و بہبود کےلیے فوری اقدامات پر زور

رانا مشہود کی وزیراعلیٰ کو ڈیجیٹل یوتھ ہب کے بارے میں آگاہی

اس سال سرکاری حج اخراجات 10 لاکھ 50 ہزار روپے مقرر کیے گئے ہیں، سردار یوسف

وزیراعلیٰ کی روڈ ٹو مکہ کے تحت سکھر سے حج پروازیں شروع کرنے کی تجویز

کراچی (17 اپریل) وزیر اعلیٰ سندھ سید مراد علی شاہ نے وزیر اعظم یوتھ پروگرام کے چیئرمین رانا مشہود اور وفاقی وزیر برائے مذہبی امور سے الگ الگ ملاقاتیں کیں جن میں ان کے متعلقہ شعبوں سے جڑے امور پر تبادلہ خیال کیا گیا۔

وزیر اعلیٰ سندھ سید مراد علی شاہ نے رانا مشہود سے ملاقات میں وزیر اعظم یوتھ پروگرام اور محکمہ کھیل و امورِ نوجوانان سندھ کے درمیان روابط کو مضبوط بنانے پر بات کی اور اس پر اتفاق بھی کیا۔ ملاقات کے دوران طے پایا کہ اس اشتراکِ عمل کے ذریعے سندھ کے نوجوانوں کو مختلف ممالک میں روزگار، تعلیمی تبادلے اور مشاہداتی دوروں کے مواقع حاصل ہوں گے۔

یہ ملاقات وزیراعلیٰ ہاؤس میں ہوئی جس میں وزیراعلیٰ کے سیکریٹری رحیم شیخ اور سیکریٹری ٹرانسپورٹ علیم لاشاری سمیت دیگر اعلیٰ افسران بھی شریک تھے۔

وزیر اعلیٰ سندھ مراد علی شاہ نے سندھ کے نوجوانوں کو بااختیار بنانے اور ان کی فلاح و بہبود کے لیے فوری اقدامات کی ضرورت پر زور دیا۔ انہوں نے اس بات کی اہمیت اجاگر کی کہ وزیر اعظم یوتھ پروگرام کے تحت نوجوانوں کو بہتر روزگار کے مواقع، بین الاقوامی مشاہداتی دورے اور تعلیمی تبادلے فراہم کیے جائیں۔

رانا مشہود نے وزیر اعلیٰ کو حال ہی میں شروع کیے گئے ڈیجیٹل یوتھ ہب کے بارے میں آگاہ کیا جو نوجوانوں کو سرکاری اور نجی شعبوں میں روزگار کے مواقع سے جوڑنے کے لیے قائم کیا گیا ہے۔ انہوں نے پاکستان سے ہنر مند نوجوانوں کو بیرونِ ملک بھیجنے کے وژن کا بھی اظہار کیا اور بتایا کہ دنیا بھر میں پاکستانی تربیت یافتہ پیشہ ور افراد کی مانگ بڑھ رہی ہے۔

وزیر اعلیٰ مراد علی شاہ نے کہا کہ سندھ حکومت تکنیکی تعلیم پر خصوصی توجہ دے رہی ہے تاکہ نوجوانوں کو عملی مہارتیں فراہم کی جا سکیں اور وہ مختلف ممالک میں روزگار حاصل کرنے کے قابل بن سکیں۔ فریقین نے وزیر اعظم یوتھ پروگرام اور محکمہ کھیل و امورِ نوجوانان سندھ کے درمیان روابط کو مزید مضبوط بنانے پر اتفاق کیا تاکہ سندھ کے نوجوانوں کے لیے بین الاقوامی روزگار اور تعلیمی مواقع پیدا کیے جا سکیں۔

مراد علی شاہ کی وفاقی وزیر مذہبی امور سے ملاقات

وزیر اعلیٰ سندھ سید مراد علی شاہ نے وفاقی وزیر مذہبی امور سردار محمد یوسف سے ملاقات کی جس میں حج کوٹہ اور انتظامی امور پر تبادلہ خیال کیا گیا۔

ملاقات میں سندھ کے وزیر زکوٰۃ، عشر و مذہبی امور ریاض شاہ شیرازی اور متعلقہ سیکریٹریز بھی شریک تھے۔ اس موقع پر وزیر اعلیٰ اور وفاقی وزیر نے حج کوٹے، انتظامی تیاریوں اور سکھر سے حج پروازیں شروع کرنے کے معاملات پر گفتگو کی۔

وفاقی وزیر سردار یوسف نے بتایا کہ اس سال سرکاری حج اخراجات 10 لاکھ 50 ہزار روپے مقرر کیے گئے ہیں۔ انہوں نے مزید بتایا کہ اس سال حکومت کی اسکیم کے تحت پاکستان سے 90 ہزار عازمین حج ادا کریں گے جبکہ مزید 90 ہزار کا کوٹہ نجی حج آپریٹرز کے لیے مختص کیا گیا تھا تاہم سعودی حکام کی جانب سے نظام میں تبدیلی کے باعث یہ مکمل طور پر نافذ نہ ہو سکا۔

ان تبدیلیوں کے سبب اس سال صرف تقریباً 23 ہزار عازمین ہی نجی حج آپریٹرز کے ذریعے حج ادا کر سکیں گے۔ وزیر اعلیٰ کو آگاہ کیا گیا کہ نجی اسکیم کے تحت حج کی زیادہ سے زیادہ فیس 30 لاکھ روپے مقرر کی گئی ہے۔

وزیر اعلیٰ مراد علی شاہ نے سکھر سے "روڈ ٹو مکہ" اقدام یا حج پروازیں شروع کرنے کی تجویز پیش کی جس پر وفاقی وزیر نے مثبت جواب دیتے ہوئے یقین دہانی کرائی کہ آئندہ سال کے حج پلان میں سکھر سمیت دیگر شہروں سے بھی حج پروازیں شامل کی جائیں گی۔