ھر ھڪ تائين تعليم پھچائڻ ۽ استادن جي سکيا حڪومت جي پھرين ترجيح آھي، وڏو وزير

ڪراچي (20 جنوري): سنڌ جي وڏي وزير سيد مراد علي شاه پنهنجي حڪومت جي تعليمي ترجيحن تي روشني وجهندي چيو آهي ته تعليم تائين رسائي وڌائڻ، استادن جي معيار کي بهتر بڻائڻ ۽ اسڪول کان ٻاهر رهجي ويل ٻارن کي ٻيهر تعليمي نظام ۾ آڻڻ انتهائي ضروري آهي. هن چيو ته نجي شعبي جون ڀائيواريون ۽ قدم سرڪاري ڪوششن کي مڪمل ڪن ٿا جيئن هڪ جوابده ۽ جامع تعليمي فريم ورڪ جوڙي سگهجي. هو پي اي سي ايڇ ايس ڪيمپس ۾ بيڪن هائوس جي گولڊن جوبلي تقريب کي خطاب ڪري رهيو هو جتي اداري جي تعليم جي شعبي ۾ پنجاهه سالن جي خدمتن کي خراجِ تحسين پيش ڪيو ويو. وڏي وزير بيڪن هائوس جي ان سفر کي ساراهيو جيڪو 1975ع ۾ هڪ ننڍڙي مونٽيسوري اسڪول کان شروع ٿي اڄ دنيا جي وڏن نجي تعليمي نيٽ ورڪن مان هڪ بڻجي چڪو آهي جتي پاڪستان ۽ ٻاهرين ملڪن ۾ چار لک کان وڌيڪ شاگرد تعليم حاصل ڪري رهيا آهن. تقريب جي شروعات ۾ وڏي وزير گل پلازه جي واقعي جي شهيدن لاءِ دعا ڪئي ۽ سوڳوار خاندانن سان يڪجهتي جو اظهار ڪيو. ان کانپوءِ هن بيڪن هائوس جي بصيرت افروز قيادت ۽ معياري ۽ جامع تعليم لاءِ ان جي مسلسل عزم کي زبردست خراجِ تحسين پيش ڪيو. بيڪن هائوس جي گولڊن جوبلي تقريبن ۾ اداري جي ان نمايان ارتقا کي اجاگر ڪيو ويو جيڪو صرف 19 ٻارن جي هڪ مونٽيسوري اسڪول کان وڌي عالمي سطح تي تسليم ٿيل تعليمي نيٽ ورڪ بڻجي چڪو آهي. ان موقعي تي بيڪن هائوس جي چيئرپرسن نسرين محمود قصوري، چيف ايگزيڪيوٽو آفيسر قاسم قصوري، اڳوڻو وفاقي وزير خارجه خورشيد محمود قصوري، حڪومت سنڌ جا ميمبر، سينيئر ماهر تعليم، بيڪن هائوس جي قيادت، استاد ۽ معزز مهمان موجود هئا. وڏي وزير چيو ته بيڪن هائوس جي ڪاميابي رڳو اداري جي تسلسل جي علامت ناهي پر ان شعبي ۾ ان جي مستقل اهميت کي به ظاهر ڪري ٿي جيڪو سماجن ۽ قومي ڪردار جي تعمير ڪري ٿو. هن نشاندهي ڪئي ته نيشنلائيزيشن کان پوءِ پاليسي تبديليُن جي نتيجي ۾ نيٽ ورڪ جي توسيع معياري تعليم تائين رسائي وڌائڻ ۾ اهم ڪردار ادا ڪيو جيڪا ڊگهي عرصي تائين اشرافيه ۽ مشنري ادارن تائين محدود رهي. نسرين محمود قصوري کي خاص خراجِ تحسين پيش ڪندي سيد مراد علي شاه چيو ته ملڪ ڀر ۾ تدريس ۽ تعليم لاءِ اعليٰ معيار قائم ڪرڻ ۾ سندن قيادت انتهائي اهم رهي آهي. هن بيڪن هائوس کي پاڪستان جي تعليمي شعبي ۾ عورتن جي سڀ کان وڏن روزگار فراهم ڪندڙن مان هڪ قرار ڏنو، جتي 18 هزار کان وڌيڪ عملي مان اڪثريت عورتن تي مشتمل آهي، جيڪي استاد، اسڪول اڳواڻ ۽ تعليمي منتظم طور خدمتون سرانجام ڏئي رهيون آهن. هن وڌيڪ چيو ته سڀني صوبن ۽ آزاد ڄمون ۽ ڪشمير ۾ بيڪن هائوس جي موجودگي معياري نصاب ۽ دي ايجوڪيٽرز جهڙن قدمن ذريعي قومي يڪجهتي کي مضبوط ڪيو آهي جن جي نتيجي ۾ گهٽ آمدني وارن خاندانن لاءِ منظم ۽ سستي تعليم ممڪن بڻجي آهي. بين الاقوامي سطح تي بيڪن هائوس پاڪستان جي نرم تشخص جو مؤثر سفير بڻجي عالمي تعليمي فورمن تي احترام ۽ سڃاڻپ حاصل ڪري چڪو آهي.

سنڌ جي تعليمي ترجيحن بابت ڳالهائيندي وڏي وزير هڪ ڀيرو ٻيهر تعليم تائين رسائي وڌائڻ، استادن جي معيار ۾ بهتري ۽ اسڪول کان ٻاهر ٻارن کي ٻيهر نظامِ تعليم ۾ شامل ڪرڻ جي ضرورت تي زور ڏنو. هن چيو ته بيڪن هائوس جون ڀائيواريون ۽ نجي شعبي جا قدم هڪ جوابده ۽ جامع تعليمي نظام جي قيام ۾ سرڪاري ڪوششن جي تڪميل ڪن ٿا. تقريب دوران وڏي وزير سنڌ سيد مراد علي شاه مسز نسرين محمود قصوري سان گڏ سندن ڪتاب ونس اپون اي ٽائيم – هڪ دفعو جو ذڪر آهي جي رونمائي لاءِ تختي جي نقاب ڪشي ڪئي. ان موقعي تي اڳوڻو وفاقي وزير خارجه خورشيد محمود قصوري ۽ ٻيون معزز شخصيتون به موجود هيون. تقريب جي پڄاڻي تي بيڪن هائوس برادري کي تعليمي ميدان ۾ پنج ڏهاڪن جي تڪميل تي مبارڪباد ڏني وئي ۽ اداري کي مسلسل قيادت، عوامي خدمت ۽ ايندڙ نسلن جي تعمير لاءِ عزم جي علامت قرار ڏنو ويو. تقريب ۾ ايندڙ وقت شايع ٿيندڙ يادگاري ڪتاب ڏانهن به ڌيان ڇڪايو ويو جيڪو گولڊن جوبلي جي موقعي تي شايع ڪيو ويندو ۽ جنهن کي علائقائي تاريخ، قدرن ۽ گڏيل بيانيي کي ڪلاس روم کان ٻاهر محفوظ رکڻ واري اهم دستاويز طور بيان ڪيو ويو.