ڪراچي لاءِ 25 ارب رپين جي منظوري: 315 اندرين گهٽيون ۽ 60 وڏيون شاهراهون ٻيهر تعمير ٿينديون، وڏي وزير جو ڪم جنگي بنيادن تي ڪرڻ جو حڪم

ڪراچي (24 نومبر): سنڌ جي وڏي وزير سيد مراد علي شاهه ڪراچي شهر جي 315 اندرين روڊن ۽ گھٽين ۽ 60 وڏين شاهرائن جي ٻيهر تعمير لاءِ 25 ارب رپيا منظور ڪري ڇڏيا آهن۔ وڏي وزير چيو ته شهرين کي انفراسٽرڪچر ۽ ٽريفڪ جي اذيت مان ڇوٽڪارو ڏيارڻ لاءِ فنڊ رنڊڪ نه بڻبا پر ڪم فوراً شروع ٿيڻ ضروري آهي. هي اجلاس سومر ڏينهن وزيراعليٰ هائوس ۾ ڪوٺايو ويو جنهن ۾ وزير بلديات سيد ناصر شاهه، ميئر ڪراچي مرتضىٰ وهاب، چيف سيڪريٽري آصف حيدر شاهه، وڏي وزير جو پرنسپل سيڪريٽري آغا واصف، سينيئر ميمبر بورڊ آف روينيو خالد حيدر شاهه ۽ ٻين اهم عملدارن شرڪت ڪئي۔ وڏي وزير شهر ۾ تازي برساتن سبب ٿيندڙ وڏي پيماني تي نقصان جو اعتراف ڪندي چٽو چيو مون کي ڪم نظر اچڻ گهرجي. هن چيو ته ڪراچي جا روڊ خراب حالت ۾ آهن جڏهن ته جاري ميگا پروجيڪٽس به ٽريفڪ جي مسئلن ۾ اضافو ڪري رهيا آهن تنهنڪري ترقياتي ڪم ۾ تيزي ضروري آهي ته جيئن عوام وڌيڪ پريشاني برداشت نه ڪري. وڏي وزير ميئر کي واضع هدايت ڪئي ته دير ڪنهن صورت ۾ برداشت نه ڪئي ويندي، فنڊ مسئلو ناهن؛ مون کي ڪم جنگي بنيادن تي ڪرڻو آهي. ميئر ڪراچي جي بريفنگ: ميئر مرتضىٰ وهاب وڏي وزير کي روڊن جي نقصان ۽ بحالي واري منصوبي بابت تفصيل سان آگاهه ڪيو۔ اندريون گهٽيون: ميئر ٻڌايو ته شهر جون 315 گهٽيون خراب آهن ۽ فوري مرمت جي ضرورت آهي۔ وڏي وزير سڀئي اندرين گهٽي واريون اسڪيمون فوري طور منظور ڪندي چيو ته ڪم تيزي سان شروع ڪيو وڃي۔ وڏيون شاهراهون: وڏي وزير کي ٻڌايو ويو ته شهر جون 60 وڏيون شاهراهون ٻيهر تعمير ٿيڻيون آهن جن تي لڳ ڀڳ 25 ارب رپيا خرچ ايندو۔ مربوط يوٽيلٽي نظام: وڏي وزير واضح هدايت ڪئي جن گھٽين جي تعمير ٿئي ٿي انهن جو نيڪال سسٽم مڪمل طور ٺهي. هن وڌيڪ چيو ته 60 شاهراهن تي ڊرينج سسٽم روڊن سان گڏ ساڳئي وقت تعمير ڪيو وڃي جيئن ٻيهر نقصان کان بچي سگهجي۔ عوامي ڀلائي ۽ سڪيورٽي: وڏي وزير مراد علي شاهه ڪيماڙي ۾ نون آر او پلانٽس جي افتتاح تي ميئر کي مبارڪباد ڏني ۽ چيو ته حڪومت عوامي ڀلائي لاءِ مصروفِ عمل آهي، اسان کي عوام لاءِ صاف پاڻي، سٺا روڊ ۽ بهترين امن امان يقيني بڻائڻو آهي. هن چيو ته شهر ۾ ٽريفڪ سيفٽي بهتر ٿي آهي ۽ سيف سٽي منصوبي تحت ٽريفڪ حادثن ۾ گهٽتائي رڪارڊ ڪئي وئي آهي۔ صوبائي حڪومت جو تيز رفتار انفراسٽرڪچر پروگرام اهو ثابت ڪري ٿو ته موجوده ترقياتي چڪر جي آخر تائين شهر جو نقشو مڪمل طور تبديل ڪيو ويندو۔ وڏن ترقياتي منصوبن بابت اڳڀرائي: وزير بلديات سيد ناصر شاهه وڏي وزير کي ڪورنگي ڪاز وي پل ۽ شاهراههِ ڀٽو ايڪسپريس وي سميت اهم منصوبن جي اڳڀرائيءَ کان آگاهه ڪيو جيڪي مڪمل ٿيڻ جي آخري مرحلن ۾ داخل ٿي چڪا آهن۔ ڪورنگي ڪازوي پل (نئون اسٽرڪچر): هي نئون اسٽرڪچر پراڻي ڪاز وي جي جاءِ وٺي رهيو آهي جيڪو برساتن ۾ ٻڏي ويندو هو ۽ ٽريفڪ جام ۽ رابطا منقطع ٿيڻ جو سبب بڻجندو هو۔ ناصر شاهه موجب منصوبو 80 سيڪڙو کان وڌيڪ مڪمل ٿي چڪو آهي۔ امڪاني افتتاح: پورو پل ڊسمبر 2025 يا جنوري 2026 ۾ مڪمل طور کلي ويندو۔ وڏي وزير چيو ته هي پل ڪورنگي لاءِ مستقل، برساتن جي خطري کان محفوظ رابطو فراهم ڪندو۔ شاهراهه ڀٽو ايڪسپريس وي: هي 39 ڪلوميٽر ڊگهي، ٽن لينن واري ايڪسپريس وي ڊي ايڇ اي ۽ ڪورنگي کي ايم-9 موٽروي سان ملائي ٿي جنهن سان مسافرن ۽ ڪمرشل ٽريفڪ جو سفر وقت گھڻو گهٽجي ويندو۔ وڏي وزير کي ٻڌايو ويو ته منصوبي جي مڪمل پيش رفت 82 سيڪڙو آهي جڏهن ته مجموعي ڪم 78 سيڪڙو تائين پهچي ويو آهي۔ سيڪشن I (قيوم آباد کان قائد آباد): هي حصو مڪمل ڪري ٽريفڪ لاءِ کولي ڏنو ويو آهي۔ شاهه فيصل انٽرچينج پڻ فعال آهي۔ سيڪشن II (قائد آباد کان ڪاٺوڙ): هي حصو 65 سيڪڙو مڪمل آهي۔ سمون ڳوٺ ايليويٽيڊ اسٽرڪچر: ملير ندي مٿان هي 4 ڪلوميٽر بلند اسٽرڪچر، مقامي ڳوٺن جي تحفظ لاءِ تعمير ٿي رهيو آهي ۽ 48 کان 50 سيڪڙو مڪمل ٿي چڪو آهي۔ نئون لنڪ روڊ (پورٽ قاسم کان ايم-9): هي 22 ڪلوميٽر ڊگهو لنڪ روڊ ڪارگو ٽريفڪ لاءِ اهم آهي ۽ 2025 جي آخر تائين مڪمل طور کلي وڃڻ جي اميد آهي۔ ڪريم آباد انڊر پاس: هي ڊگهي عرصي کان رڪاوٽن جو شڪار منصوبو وڏي وزير جي هدايتن کانپوءِ تيزي سان اڳتي وڌيو آهي ۽ ڊسمبر 2025 تائين مڪمل ٿيڻ جو امڪان آهي۔ منصوبو 85 سيڪڙو مڪمل ٿي چڪو آهي۔ بي آر ٽي ريڊ لائين: وڏي وزير ٻڌايو ته هن جي مداخلت کان پوءِ بي آر ٽي ريڊ لائين جو ڪم ٻيهر شروع ٿي چڪو آهي پر هاڻ ان جي مڪمل ٿيڻ جي تاريخ وڌي 2026 جي آخر تائين وڃي ٿي۔