سعودي عرب جي 95هين قومي ڏھاڙي تي وڏي وزير جي شرڪت، ڀائپيءَ وارن لاڳاپن کي وڌيڪ مضبوط بڻائڻ جو عزم

Posted on: 24 Sep 2025 Tags:

ڪراچي (22 سيپٽمبر): سنڌ جي وڏي وزير سيد مراد علي شاهه سعودي عرب جي 95هين قومي ڏھاڙي جي تقريب ۾ شرڪت ڪئي۔ تقريب مقامي هوٽل ۾ منعقد ڪئي وئي جنهن ۾ سعودي قونصل جنرل محمد ن۔ م۔ السباعِي، مختلف ملڪن جا سفارتي نمائندا، اعليٰ سول ۽ فوجي عملدار ۽ معزز مهمان شريڪ ٿيا۔ وڏي وزير سعودي قونصل جنرل محمد ن۔ م۔ السباعِي کي گلدستو پيش ڪيو ۽ ان کي قومي ڏينهن جي مبارڪباد ڏني۔ هن پيپلز پارٽي جي چيئرمين بلاول ڀٽو زرداري ۽ سنڌ جي عوام پاران پڻ سعودي قيادت ۽ عوام کي دلي مبارڪباد پيش ڪئي۔ تقريب کي خطاب ڪندي سيد مراد علي شاهه چيو ته پاڪستان ۽ سعودي عرب جا ڳانڍاپا دنيا ۾ پنهنجي مثال پاڻ آهن۔ هن چيو ته 1951ع جي معاهدي سان ٻنهي ملڪن جي لاڳاپن جو نئون دور شروع ٿيو ۽ تازو دفاعي معاهدو مسلم امت جي تحفظ لاءِ هڪ اهم سنگ ميل آهي۔ وڏي وزير سعودي قونصل جنرل ۽ سعودي عوام کي ٻيهر قومي ڏينهن جي مبارڪباد پيش ڪندي اميد ظاهر ڪئي ته پاڪستان ۽ سعودي عرب جي ڀائراڻا لاڳاپا وڌيڪ مضبوط ٿيندا ۽ ٻنهي ملڪن جا تعلقات وڌيڪ هٿي وٺندا۔

Back