شاهد حيات پوليس ٽريننگ ڪاليج جي 31هين پاسنگ آئوٽ پريڊ: وڏي وزير جو سنڌ پوليس کي وڌيڪ مضبوط ۽ فلاحي بڻائڻ جو اعلان

ڪراچي (14 فيبروري): سيد مراد علي شاه شاهد حيات پوليس ٽريننگ ڪاليج (SHPTC) جي 31هين پاسنگ آئوٽ پريڊ کي خطاب ڪندي سنڌ پوليس کي پيشيوراڻي تربيت ۽ فلاحي قدمن ذريعي مضبوط بڻائڻ لاءِ صوبائي حڪومت جي عزم جو ورجاءُ ڪيو. شاهد حيات پوليس ٽريننگ ڪاليج جي پاسنگ آئوٽ پريڊ ڇنڇر ڏينهن سعيدآباد، ڪراچي ۾ منعقد ٿي جنهن ۾ حيدرآباد رينج سان تعلق رکندڙ 978 نون ڀرتي ٿيل اهلڪارن کي باضابطه طور سنڌ پوليس ۾ شامل ڪيو ويو. وڏي وزير جي آمد تي کين مائونٽيڊ پوليس جي دستي ڪاليج تائين وٺي آئي جڏهن ته انسپيڪٽر جنرل سنڌ پوليس جاويد عالم اوڍو، ايڊيشنل انسپيڪٽر جنرل ڪراچي آزاد خان، ايڊيشنل انسپيڪٽر جنرل ٽريننگ اقبال ڊار، ڊپٽي انسپيڪٽر جنرل پوليس ٽريننگ فيض الله ڪوريجو ۽ ٻين سينيئر آفيسرن سندن ڀليڪار ڪيو. تقريب دوران باضابطه مارچ پاسٽ، سلامي ۽ نون تربيت يافته اهلڪارن کان حلف ورتو ويو. پرنسپل پوليس ٽريننگ ڪاليج ساجد امير سدوزئي استقباليه خطاب ڪيو جڏهن ته انسپيڪٽر جنرل سنڌ جاويد عالم اوڍو فورس جي پيشيوراڻي ڪردار، مشن ۽ ڪاميابين تي روشني وڌي ۽ وزيراعليٰ جي لڳاتار سهڪار تي سندن ٿورا مڃيا. پريڊ کي خطاب ڪندي وڏي وزير 879 نون پاس آئوٽ ٿيل پوليس اهلڪارن کي مبارڪباد ڏيندي کين قوم جو فخر ۽ شهرين جي جان ۽ مال جا محافظ قرار ڏنو. هن چيو ته عوام، سول سوسائٽي ۽ حڪومت جون سنڌ پوليس سان وڏيون اميدون وابسته آهن ۽ ڏوهن جي روڪٿام، ڏوهاري عنصرن جي گرفتاري ۽ قانون جي بالادستي فورس جون بنيادي ذميواريون آهن. هن چيو ته مؤثر قانون لاڳو ڪرڻ سان عوام جو اعتماد مضبوط ٿيندو آهي. مراد علي شاه چيو ته جديد گهرجن موجب ضرورت تي ٻڌل تربيت پوليس جي ڪاميابي لاءِ لازمي آهي ۽ سنڌ پوليس دهشتگردي ۽ ڏوهن خلاف اثرائتي ڪارروائيون ڪيون آهن جنهن سان امن امان جي صورتحال بهتر ٿي آهي. هن چيو ته هڪ وقت اهڙو به هو جڏهن شهرن ۾ بار بار ڌماڪا ٿيندا هئا ۽ بدامني عام هئي پر سيڪيورٽي فورسز جي عزم ۽ قربانين سبب دهشتگردي کي وڏي حد تائين ختم ڪيو ويو آهي تنهن هوندي به علائقائي خطرن سبب مستقل چوڪس رهڻ ضروري آهي. وڏي وزير تازي ڪارڪردگي جو ذڪر ڪندي چيو ته گذريل ٽن مهينن دوران پوليس ڏوهارين خلاف نمايان ڪاميابيون حاصل ڪيون آهن ۽ شهري علائقن ۾ اسٽرٽ ڪرائم خلاف ڪارروائي وڌيڪ تيز ڪرڻ جي ضرورت آهي. هن چيو ته تربيت پوليسنگ جي بنياد آهي ۽ موجود وسيلن اندر رهندي تربيتي ادارن کي عالمي معيار جا مرڪز بڻائڻ لاءِ سڀ سهولتون فراهم ڪيون وينديون. هڪ اهم فلاحي قدم طور وڏي وزير پوليس اهلڪارن جي ماهوار فوڊ الائونس ۾ اضافو ڪري ان کي 10 هزار رپيا ڪرڻ جو اعلان ڪيو. هن اميد ظاهر ڪئي ته نوان شامل ٿيندڙ اهلڪار ايمانداري، لگن ۽ پيشيوراڻي صلاحيت سان پنهنجا فرض نڀائيندا ۽ سنڌ پوليس جي ساک برقرار رکندا. انسپيڪٽر جنرل پوليس جاويد عالم اوڍو تقريب کي خطاب ڪندي فارغ التحصيل اهلڪارن کي مبارڪباد ڏني ۽ چيو ته طاقت جو حقيقي حسن ان جي منصفاڻِي استعمال ۾ آهي. هن اهلڪارن کي عوامي خدمت ۽ غيرجانبداري کي اوليت ڏيڻ جي تلقين ڪئي. تقريب جي موقعي تي وڏي وزير نئين سر تعمير ٿيل “ڀٽائي ميس هال” جو افتتاح پڻ ڪيو جنهن ۾ 300 تربيت حاصل ڪندڙ اهلڪارن جي گنجائش آهي. وڌيڪ سهولتن ۾ تربيت حاصل ڪندڙ عورت اهلڪارن لاءِ 10 ايڪڙن تي مشتمل نئون پي ٽي گرائونڊ ۽ جاگنگ ٽريڪ پڻ شامل آهن. پرنسپل شاهد حيات پوليس ٽريننگ ڪاليج ساجد امير سدوزئي ٻڌايو ته 1984ع ۾ قيام کان وٺي هي ادارو مختلف قومي ۽ صوبائي قانون لاڳو ڪندڙ ادارن لاءِ 94 هزار کان وڌيڪ آفيسرن کي تربيت ڏئي چڪو آهي. هن چيو ته نون ڀرتي ٿيل اهلڪارن کي جديد جاچ طريقن، ٽيڪنالاجي جي استعمال ۽ پيشيوراڻي اخلاقيات بابت سخت تربيت ڏني وئي آهي ته جيئن هو موجوده سيڪيورٽي چئلينجن کي مؤثر نموني منهن ڏئي سگهن. تقريب جي پڄاڻي تي نمايان ڪارڪردگي ڏيکاريندڙ اهلڪارن ۾ انعام ورهايا ويا، جنرل سلامي پيش ڪئي وئي ۽ نون آفيسرن روايتي مارچ پاسٽ جو مظاهرو ڪيو.