شہید ذوالفقار علی بھٹو نے 1974 میں علامہ اقبال اوپن یونیورسٹی قائم کی، وزیراعلیٰ سندھ

Posted on: 15 Feb 2026 Tags:

کراچی (4 جنوری 2026ء) وزیراعلیٰ سندھ سید مراد علی شاہ نے تعلیم کے حوالے سے اپنی حکومت کے پختہ عزم کا اعادہ کرتے ہوئے کہا ہے کہ تعلیم ہی ایک متوازن معاشرے اور مضبوط ریاست کی واحد ضمانت ہے۔ وہ علامہ اقبال اوپن یونیورسٹی (اے آئی او یو) کے سندھ چیپٹر کے 2025 کے کانووکیشن میں بحیثیت مہمانِ خصوصی خطاب کر رہے تھے، جو بحریہ آڈیٹوریم، کارساز، کراچی میں منعقد ہوا۔ گریجویٹس، اساتذہ اور والدین کے بڑے اجتماع سے خطاب کرتے ہوئے وزیراعلیٰ سندھ نے کہا کہ یہ کانووکیشن محض اسناد کی تقسیم نہیں بلکہ صبر، محنت اور امید سے بھرپور ایک طویل فکری سفر کا جشن ہے۔ وزیراعلیٰ سندھ نے پاکستان پیپلز پارٹی (پی پی پی) کے بانی شہید ذوالفقار علی بھٹو کو زبردست خراجِ تحسین پیش کیا جنہوں نے ایک ایسے تعلیمی ادارے کا تصور پیش کیا جس نے وقت، فاصلے اور حالات کی رکاوٹوں کو توڑ دیا۔ انہوں نے کہا کہ علامہ اقبال اوپن یونیورسٹی اس وژن کی علامت ہے جہاں علم ایک ایسی روشنی ہے جو عام آدمی تک پہنچ کر سماج کی تقدیر بدل دیتی ہے۔ آج یہ وژن ایک تناور درخت بن چکا ہے جو پاکستان بھر میں لاکھوں طلبہ کو سایہ فراہم کر رہا ہے۔ مراد علی شاہ نے ایک متاثر کن تاریخی واقعہ بھی بیان کیا کہ شہید محترمہ بے نظیر بھٹو نے اپنے پہلے دورِ وزارتِ عظمیٰ کے دوران علامہ اقبال اوپن یونیورسٹی میں ایک قلیل مدتی کورس میں داخلہ لیا تھا۔ ان کے بقول، یہ عمل اس بات کی علامت ہے کہ قیادت کی اصل خوبصورتی سیکھنے کے مسلسل عمل میں مضمر ہے۔ گریجویٹس کو مبارکباد دیتے ہوئے وزیرِاعلیٰ سندھ نے کہا کہ ان کی اسناد ’کامیابی کی رسیدیں‘ ہیں اور ان کی اندرونی طاقت اور قربانیوں کا ثبوت ہیں۔ انہوں نے طلبہ پر زور دیا کہ وہ اپنی تعلیم کو صرف ذاتی مفاد کا ذریعہ نہ سمجھیں بلکہ سماجی انصاف، برداشت اور انسانی وقار کے فروغ کی ذمہ داری کے طور پر لیں۔ انہوں نے طلبہ سے خطاب کرتے ہوئے کہا کہ آپ کو اپنے علم کو سماج کی فکری ترقی کے لیے استعمال کرنا چاہیے۔ سندھ حکومت تعلیم کو محض ایک انتظامی معاملہ نہیں سمجھتی بلکہ ہم اسے قوم کے مستقبل کی ضمانت تصور کرتے ہیں۔ اپنی تقریر کے ایک جذباتی حصے میں وزیرِاعلیٰ سندھ نے والدین کی طرف توجہ مبذول کرائی اور کہا کہ بچوں کی کامیابی کے پیچھے والدین کی خاموش قربانیاں ہوتی ہیں، جو اکثر اپنی ضروریات قربان کر کے بچوں کی تعلیم کے لیے اخراجات پورے کرتے ہیں۔ انہوں نے وائس چانسلر پروفیسر ڈاکٹر ناصر محمود اور جامعہ کی فیکلٹی کو بھی سراہا جنہوں نے بے شمار چیلنجز کے باوجود علم کے چراغ کو روشن رکھا اور تعلیم کو ہر طالبِ علم کی دہلیز تک پہنچایا۔وزیراعلیٰ سندھ سید مراد علی شاہ نے کہا کہ ان کی حکومت فاصلاتی تعلیم اور تاحیات تعلیمی مواقع کو وسعت دینے کے لیے سنجیدہ اقدامات کر رہی ہے۔ انہوں نے گریجویٹس کی کامیابی کے لیے دعا کی اور انہیں تلقین کی کہ وہ دیانت، انسانیت اور قومی خدمت کو اپنے پیشہ ورانہ میدان میں اپنی پہچان بنائیں۔ تقریب کے اختتام پر صوبے بھر سے کامیاب ہونے والے طلبہ میں گولڈ میڈلز اور اسناد تقسیم کی گئیں۔

Back