سنڌ جي وڏي وزير مراد علي شاهه سان ترڪي ۽ بنگلاديش جي نون سفارتڪارن جون ملاقاتون

Posted on: 24 Sep 2025 Tags:

ڪراچي (22 سيپٽمبر): سنڌ جي وڏي وزير سيد مراد علي شاهه، وزيراعليٰ هائوس ۾ نئين مقرر ٿيل ترڪي جي قونصل جنرل مسٽر ارگُل ڪڊڪ ۽ نئين مقرر ٿيل بنگلاديش جي ڊپٽي هاءِ ڪمشنر مسٽر محمد ثاقب صداقت سان الڳ الڳ ملاقاتون ڪيون. وڏي وزير ٻنهي سفارتڪارن کي ڀليڪار ڪندي سنڌ حڪومت جي مڪمل سهڪار جي خاطري ڪرائي ۽ ڀائراڻي مسلم ملڪن سان لاڳاپن کي وڌيڪ مضبوط ڪرڻ جي اهميت تي زور ڏنو. مسٽر ڪڊڪ سان ملاقات دوران مراد علي شاهه چيو ته پاڪستان ۽ ترڪي ۾ تاريخي لاڳاپا آهن ۽ ٻنهي ملڪن جي وچ ۾ واپار کي وڌيڪ وڌائڻ جي ضرورت آهي. هن قونصل جنرل کي سنڌ ۾ جاري ميگا پروجيڪٽس بابت آگاهه ڪيو خاص طور تي روڊن، انرجي ۽ پاڻي جي شعبن ۾، ۽ ڪراچي (جيڪو 21 ملين کان وڌيڪ ماڻهن جو شهر آهي) ۾ پبلڪ ٽرانسپورٽ جي منصوبن ۾ ترڪ سيڙپڪارن کي سيڙپڪاري لاءِ سڏ ڪيو. ترڪ ڪونسل جنرل ڪراچي جي مهمان نوازي کي ساراهيندي ان کي محبت ڪندڙ ماڻهن جو عظيم شهر قرار ڏنو ۽ سيڙپڪاري جي موقعن ۾ دلچسپي ظاهر ڪئي. طئي ٿيو ته سنڌ جي انويسٽمينٽ کاتي جو سربراهه ترڪ ڪونسل جنرل سان ايندڙ ملاقات ۾ ممڪن منصوبن تي ڳالھ ٻولھ ڪندو. مسٽر صداقت سان ملاقات دوران وڏي وزير چيو ته بنگلاديش ۽ پاڪستان ڀائراڻي مسلم ملڪ آهن ۽ واپاري تعاون کي وڌائڻ جي ضرورت آهي. ٻنهي ڌرين ٻطرفا لاڳاپا مضبوط ڪرڻ جي طريقن تي ڳالهايو ۽ پاڪستان ۾ تازي ٻوڏ واري صورتحال تي خيالن جي ڏي وٺ ڪئي. مراد علي شاهه ٻيهر زور ڏنو ته سنڌ ترڪي ۽ بنگلاديش سان پنهنجي لاڳاپن کي اهميت ڏئي ٿو ۽ واپار، سيڙپڪاري ۽ ترقياتي منصوبن ۾ وڌيڪ سهڪار وڌائڻ جو خواهشمند آهي۔

Back