سنڌ جي وڏي وزير سيد مراد علي شاهه جو اميد جي عالمي ڏھاڙي تي اھم پيغام

Posted on: 12 Jul 2025 Tags:

ڪراچي (12 جولاءِ 2025ع) سنڌ جي وڏي وزير سيد مراد علي شاهه اميد جي عالمي ڏھاڙي جي موقعي تي سندس پيغام ۾ چيو آهي ته اميد اهو ڏيئو آهي، جيڪو نااميدي ۽ اونداهين ۾ روشني آڻي ٿو. اها ئي روشني فرد، سماج ۽ قوم جي سڌاري جو رستو ڏيکاري ٿي. سيد مراد علي شاهه چيو ته معاشري ۾ برداشت، ڀائيچاري ۽ بهتري لاءِ گڏيل ڪوششون ڪرڻيون پونديون. اسان جا نوجوان پاڪستان جي روشن مستقبل جي اميد جو ڪرن آهن ۽ سنڌ جا نوجوان تبديلي جا معمار آهن. اسان جو فرض آهي ته انهن جي رهنمائي، ھمت افزائي ۽ سهولتون مهيا ڪيون وڃن. هن اميد جي عالمي ڏھاڙي تي زور ڏنو ته مثبت سوچ کي عملي قدمن ۾ تبديل ڪيو وڃي ۽ پنهنجي ڀرپاسي وارن لاءِ اميد جو وسيلو بڻجڻ جي ڪوشش ڪئي وڃي. وڏي وزير چيو ته ننڍڙا اپاءَ به وڏو فرق آڻي سگهن ٿا، تنهنڪري اڄ ڪنهن جي زندگي ۾ اميد جو ڏيئو ٻاريو. نوجوانن کي مخاطب ٿيندي وڏي وزير چيو ته علم، ڪردار ۽ خدمت جي ذريعي معاشري ۾ اميد پيدا ڪريو. سنڌ حڪومت اميد، امن ۽ يڪجهتي جي سوچ سان اڳتي وڌي رهي آهي. سيد مراد علي شاهه چيو ته گڏيل سوچ، مثبت بڻجي ۽ مستقبل کي بهتر بڻائي سگھجي ٿو. ھن وڌيڪ چيو تھ ”سرڪل آف هوپ“ جهڙا مڪالما مثبت تبديليءَ جي شروعات ٿي سگهن ٿا. آخر ۾ هن چيو ته خدمت، همدردي ۽ خيالن جي ڏي وٺ اميد کي زندهه رکن ٿا، ڏکئي وقت ۾ پڻ اميد جو آسرو نه ڇڏيو، ڇو ته اميد ئي زندگيءَ جي سڀ کان وڏي طاقت آهي.

Back