11 آگسٽ قائداعظم جي برابري ۽ آزادي واري ويزن جي تجديد جو ڏينهن آهي، مراد علي شاهه جو اقليتن جي حقن جي تحفظ جو عزم

11 آگسٽ قائداعظم جي برابري ۽ آزادي واري ويزن جي تجديد جو ڏينهن آهي، مراد علي شاهه جو اقليتن جي حقن جي تحفظ جو عزم

ڪراچي (11 آگسٽ) سنڌ جي وڏي وزير سيد مراد علي شاهه، اقليتن جي ڏھاڙي تي صوبائي اسيمبلي کي خطاب ڪندي پاڪستان جي باني قائداعظم محمد علي جناح جي تاريخي ويزن کي ياد ڪندي چيو ته 11 آگسٽ اهو ڏينهن آهي جيڪو قوم کي قائد جي تاريخي خطاب جي ياد ڏياري ٿو۔ وڏي وزير چيو ته اسين انهيءَ اسيمبلي هال ۾ گڏ ٿيا آهيون جتي سڀ کان پهرين قراردادِ پاڪستان منظور ٿي هئي۔ 11 آگسٽ 1947 تي قائداعظم ملڪ هلائڻ جو پنهنجو ويزن پيش ڪندي چيو هو ته هر شخص کي پنهنجي مندر، مسجد يا ڪنهن به عبادتگاهه ۾ وڃڻ جي مڪمل آزادي آهي ۽ مذهب يا عقيدي جو رياست جي معاملن سان ڪو تعلق ناهي۔ مراد علي شاهه چيو ته جيتوڻيڪ پاڪستان 1947 ۾ آزاد ٿيو پر 2009 ۾ ان وقت جي صدر آصف علي زرداري 11 آگسٽ کي سرڪاري طور تي اقليتن جو ڏينهن قرار ڏنو۔ هن چيو ته ان کان پوءِ اسين هي ڏينهن هر سال آزاديءَ جي ڏينهن کان ٽي ڏينهن اڳ ملهائيندا آهيون ته جيئن قائداعظم جي مساوات ۽ انصاف واري ويزن جي تجديد ٿئي۔ وڏي وزير زور ڏنو ته پاڪستان جي قومي جهنڊي جو سائو رنگ مسلم اڪثريت جي نمائندگي ڪري ٿو جڏهن ته اڇو رنگ ملڪ جي اقليتن جي علامت آهي۔ تاريخي حوالي سان هن چيو ته 26 جون 1947 تي سنڌ اسيمبلي پاڪستان سان شموليت جي حق ۾ ووٽ ڏنو، جنهن ۾ 33 ميمبرن حمايت ڪئي ۽ 20 مخالفت ڪئي اهڙيءَ ريت سنڌ پاڪستان جي حمايت ڪندڙ پهريون صوبو بڻيو۔ قائداعظم محمد علي جناح جا لفظ ورجائيندي وزيراعليٰ چيو ته قائداعظم پاڻ کي پاڪستان ۾ هندو اقليتن جو محافظ سمجهندا هئا۔ هن شهيد ذوالفقار علي ڀٽو جي ويزن جو به حوالو ڏنو جن اهڙي پاڪستان جو خواب ڏٺو هو جتي سڀني کي برابر جا حق حاصل هجن۔ مراد علي شاهه شهيد محترمه بينظير ڀٽو جي نظريي جو به ذڪر ڪيو جن جو چوڻ هو ته آمِرن مذهب کي هٿيار طور استعمال ڪيو پر عوام هميشه جمهوريت، انساني حقن ۽ مساوات ذريعي انتهاپسندي کي رد ڪيو۔ وڏي وزير جي سڃاڻپ کي صوفي بزرگن جي ڌرتي طور اجاگر ڪيو جن ۾ شاهه عبداللطيف ڀٽائي، سچل سرمست ۽ لعل شهباز قلندر شامل آهن، ۽ جن مذهبي هم آهنگي جو پيغام ڏنو۔ هن چيو ته سنڌ جي ماڻهن هميشه نفرت ڦهلائڻ جي ڪوششن کي رد ڪيو آهي ۽ امن ۽ محبت لاءِ ياد رکيا ويندا۔ اقليتي برادرين لاءِ صوبائي حڪومت جي قدمن جو ذڪر ڪندي مراد علي شاهه چيو ته سنڌ حڪومت هندو ميئرج ايڪٽ منظور ڪيو گهٽ عمري جي شادي تي پابندي لاڳو ڪئي، سڀني مذهبن جي عبادتگاهن جو تحفظ يقيني بڻايو ۽ اقليتي نوجوانن لاءِ تعليم ۽ روزگار جا موقعا فراهم ڪيا۔ هن بين المذاهب ڳالهه ٻولهه کي فروغ ڏيڻ جي عزم جو اظهار ڪيو، ته جيئن امن ۽ اتحاد کي وڌايو وڃي ۽ ايندڙ نسلن لاءِ مذهبي ۽ ثقافتي ورثو محفوظ بڻايو وڃي۔ خطاب جي پڄاڻي تي وڏي وزير سڀني کي مساوات جو عهد ڪرڻ جي دعوت ڏني ۽ چيو ته ڪو به وڏو يا ننڍو ناهي سڀ برابر آهن۔ خوف يا محرومي نه هجڻ گهرجي رڳو عزت ۽ سڀني لاءِ موقعا هئڻ گهرجن۔ اهوئي قائداعظم جو پاڪستان آهي ۽ اهوئي اسان جي قيادت جو ويزن آهي۔ اچو ته گڏجي ان کي حقيقت بڻايون۔