ڀارتي جارحيت خلاف پيپلز پارٽيءَ جي ڪراچيءَ ۾ ريلي، وڏي وزير جو خطاب

ڀارتي جارحيت خلاف پيپلز پارٽيءَ جي ڪراچيءَ ۾ ريلي، وڏي وزير جو خطاب

ڪراچي (7 مئي): سنڌ جي وڏي وزير سيد مراد علي شاهه ڀارتي جارحيت خلاف منعقد ٿيل ريلي کي خطاب ڪندي پهلگام واقعي کانپوءِ ڀارت پاران پاڪستان مٿان لڳايل بي بنياد الزامن جي مذمت ڪئي ۽ ڀارتي وزيراعظم نريندر مودي کي، جنهن کي هن ”گجرات جو قصائي“ قرار ڏنو، سندس اندروني ناڪامين کان ڌيان هٽائڻ لاءِ واقعي جي منصوبابندي ڪرڻ جو الزام لڳايو. احتجاجي ريلي پاڪستان پيپلز پارٽي (پ پ پ) پاران ڪراچي پريس ڪلب جي ٻاهران ڀارت جي تازين جارحيتن جي جواب ۾ منعقد ڪئي وئي. ريلي ۾ مختلف سياسي پارٽين جي اڳواڻن شرڪت ڪئي جن ۾ جماعت اسلامي، عوامي نيشنل پارٽي ۽ مسلم ليگ (ق) جا عهديدار شامل هئا، جنهن سان قومي اتحاد جو مضبوط پيغام ويو. ريلي کي خطاب ۾ سنڌ جي وڏي وزير مراد علي شاهه پهلگام واقعي کانپوءِ ڀارت پاران پاڪستان مٿان لڳايل بي بنياد الزامن جي مذمت ڪئي. هن ڀارتي وزيراعظم نريندر مودي کي، جنهن کي هن ”گجرات جو قصائي“ قرار ڏنو، سندس اندروني ناڪامين کان ڌيان هٽائڻ لاءِ واقعي جي منصوبابندي ڪرڻ جو الزام لڳايو. هن چيو ته فقط ڏهه منٽن اندر پاڪستان کي ڪنهن به جاچ کان سواءِ الزام لڳايو ويو. هن زور ڏنو ته پاڪستان هميشه دهشتگردي جو شڪار رهيو آهي ۽ هميشه کان هن معاملي ۾ بين الاقوامي جاچ جي آڇ ڪئي آهي. وڏي وزير ٻڌايو ته پاڪستان جي سول ۽ فوجي قيادت گڏيل قومن سميت عالمي برادري سان رابطو ڪيو هو، مڪمل سهڪار ۽ ثالثي جي آڇ ڪئي جڏهن ته ڀارت امن جي ان آڇ کي رد ڪيو ۽ ان بدران ڇهن الڳ الڳ هنڌن تي رات جي وقت حملا ڪيا جنهن جي نتيجي ۾ بي گناهه شهري مارجي ويا. وڏي وزير چيو ته ”اسان جي هٿياربند فوجن اهڙي طرح جواب ڏنو جو ڀارت کي ڪلاڪن اندر سفيد جهنڊا لهرائڻ تي مجبور ٿيو، پاڪستان ايئر فورس پنج ڀارتي جهاز ۽ هڪ ڊرون ڪيرايو.“ اسان صرف ان ڪري پٺيان هٽياسين ته معاملو وڌيڪ نه وڌي نه ته هڪ به ڀارتي جهاز نه بچي ها. وڏي وزير زور ڏنو ته اهو ردعمل گهمنڊ نه هو پر قوم جي اتحاد ۽ عزم جو مظاهرو هو. هن پ پ پ جي چيئرمين بلاول ڀٽو زرداري جو حوالو ڏنو جنهن چيو ته، ”اسان پرامن آهيون پر جيڪڏهن اسان جي ملڪ کي خطرو لاحق ٿيو ته ڪوبه سمجھوتو نه ٿيندو.“ وڏي وزير فخر سان هن موقعي تي ان رانديگرن جو ذڪر ڪيو جن تازو ڀارتي باڪسرن کي شڪست ڏني هئي، جنهن سان قومي حوصلو وڌيو. هن پنهنجي خطاب جي پڄاڻي ڪندي چيو ته ”رڳو ڪجهه ڪلاڪن ۾ سڀني سياسي پارٽين جا نمائندا اسان جي هٿياربند فوجن سان گڏ ٻڌيءَ لاءِ گڏ بيٺا آهن ۽ پرجوش نعري، 'پاڪستان زنده باد' سان گڏ عوام جي اڳواڻي ڪئي. وڏي وزير ٻيهر تصديق ڪئي ته جيڪڏهن ضروري ٿيو ته قوم جا 250 ملين شهري پاڪستان لاءِ پنهنجي رت جو آخري ڦڙو به قربان ڪرڻ لاءِ تيار آهن. ان موقعي تي خطاب ڪندڙن ۾ صوبائي وزير بلديات سعيد غني، اي اين پي جو صوبائي وزير شاهي سيد، جماعت اسلامي جا اڳواڻ، پ پ پ جو چونڊيل سينيٽر وقار مهدي، جماعت اسلامي ۽ مسلم ليگ (ق) جا اڳواڻ شامل هئا.