گڏيل قومن عالمي امن، انساني حقن ۽ ترقي جي علامت آهي، سنڌ جو وڏو وزير سيد مراد علي شاهه

گڏيل قومن عالمي امن، انساني حقن ۽ ترقي جي علامت آهي، سنڌ جو وڏو وزير سيد مراد علي شاهه

ڪراچي (24 آڪٽوبر 2025ع) سنڌ جي وڏي وزير سيد مراد علي شاهه گڏيل قومن جي 80 ورھين جي مڪمل ٿيڻ تي عالمي اداري ۽ سڀني ميمبر ملڪن کي واڌايون ڏيندي سندس پيغام ۾ چيو ته گڏيل قومن عالمي امن، انساني حقن ۽ ترقي جي علامت آهي ۽ سنڌ حڪومت پائيدار ترقي جي هدفن جي حصول لاءِ گڏيل قومن سان گڏ بيٺل آهي. سيد مراد علي شاهه چيو ته تعليم، صحت ۽ سماجي ڀلائي جي شعبن ۾ گڏيل قومن سان سهڪار کي وڌيڪ مضبوط بڻايو ويندو. عالمي سھڪار ئي بهتر ۽ پرامن مستقبل جي ضمانت آهي. هن چيو ته گڏيل قومن دنيا ۾ انسانيت جي ڀلائي ۽ ڪيترن ئي عالمي تڪرارن جي حل ۾ اهم ڪردار ادا ڪيو آهي، پر ڪشمير ۽ فلسطين جا مسئلا اڃا تائين حل طلب آهن. وڏي وزير چيو ته گڏيل قومن کي انصاف ۽ انساني حقن جي تقاضائن موجب ڪشمير ۽ فلسطين جي مسئلن جي حل لاءِ عملي اپاءَ وٺڻ جي گھرج آھي. سيد مراد علي شاهه چيو ته فلسطين ۾ اسرائيلي جارحيت سبب هزارين بيگناهه شهرين ۽ ٻارن جو قتل گڏيل قومن جي ڪردار تي وڏو سوال آھي. سيد مراد علي شاهه وڌيڪ چيو ته گڏيل قومن کي پنهنجي 80 سالن جي ڪارڪردگي ۽ ڪاميابين جو ازسرِ نو جائزو وٺڻ گهرجي. هي رڳو جشن نه پر انسانيت جي تحفظ ۽ انصاف جي تقاضائن جو احتساب به هجڻ گهرجي. هن چيو ته سيلاب جي حالتن ۾ گڏيل قومن پاڪستان، خاص طور سنڌ لاءِ خاص ڌيان ڏنو ۽ سنڌ حڪومت گڏيل قومن جي سهڪار سان متاثر علائقن جي بحالي ۽ ترقي لاءِ سرگرم عمل آهي. وڏي وزير چيو ته سنڌ حڪومت گڏيل قومن جي ’ايجنڊا 2030‘ ۽ ’پيڪٽ فار دي فيوچر‘ تي عملدرآمد لاءِ پرعزم آهي. هن سماجي ترقي، ماحوليات ۽ صنفي برابري جي منصوبن ۾ گڏيل قومن جي سهڪار کي ساراهيو. سيد مراد علي شاهه چيو ته اسان سڀني کي عالمي اتحاد ۽ گڏيل ترقي جي عزم سان اڳتي وڌڻو پوندو. ھن وڌيڪ چيو تھ سنڌ حڪومت ترقي ۽ خوشحالي جي سفر ۾ عالمي برادري سان ڀرپور سهڪار جاري رکندي.