وڏي وزير گل پلازا ۾ باهه جي جاچ جو حڪم ڏئي ڇڏيو، حفاظتي اپائن تي سختي سان عمل ڪرائڻ جي هدايت

ڪراچي (18 جنوري) سنڌ جي وڏي وزير سيد مراد علي شاهه گل پلازا ۾ لڳندڙ باهه جي واقعي جو سخت نوٽيس وٺندي ڪراچي جي ڪمشنر کي هدايت ڪئي آهي ته باهه لڳڻ جي سببن جي فوري جاچ ڪرائي تفصيلي رپورٽ پيش ڪئي وڃي۔ ڪراچي جي ڪمشنر حسن نقوي ۽ ڊپٽي ڪمشنر ڏکڻ جاويد کوسو، وزيراعليٰ هائوس ۾ وڏي وزير کي بريفنگ ڏيندي چيو ته باهه جو واقعو رات 9:45 ۽ 10:15 جي وچ ۾ پيش آيو. بريفنگ ۾ چيو ويو ته واقعي ۾ 1200 کان وڌيڪ دڪان سڙي رک ٿي ويا. فائر فائٽنگ آپريشنز 60 کان 70 سيڪڙو باهه تي ضابطو آندو آهي، جڏهن ته بچاءُ ۽ ڪولنگ وارو عمل اڃا تائين جاري آهن. وڏي وزير کي ٻڌايو ويو ته باهه ۾ 6 ماڻهو فوت ۽ 22 زخمي ٿيا آهن، سڀني زخمين کي علاج لاءِ سول اسپتال جي برنس وارڊ منتقل ڪيو ويو آهي. وڏي وزير کي ٻڌايو ويو ته باهه تي ضابطو آڻڻ لاءِ وڏي پيماني تي هنگامي ردعمل شروع ڪيو ويو، جنهن ۾ 22 فائر برگيڊ گاڏيون، 10 واٽر باؤزر، چار اسنارڪل گاڏيون ۽ 33 ريسڪيو 1122 ايمبولينسون حصو ورتو. وڏي وزير قيمتي انساني جانين جي نقصان تي گهري ڏک جو اظهار ڪيو ۽ فوت ٿيندڙن جي خاندانن سان دلي تعزيت ۽ همدردي جو اظهار ڪيو. هن متاثر ڪاروباري ماڻهن کي ٿيل وڏي مالي نقصان تي پڻ گهري ڏک جو اظهار ڪيو. وڏي وزير فائر فائٽنگ آپريشن دوران شهيد ٿيندڙ فائر فائٽر کي خراج تحسين پيش ڪندي چيو ته فائر فائٽرز شهرين کي بچائڻ لاءِ پنهنجون جانيون خطري ۾ وجهي ڇڏيون. هن صحت کاتي جي عملدارن کي هدايت ڪئي ته زخمين کي بهترين طبي سهولتون فراهم ڪيون وڃن. مراد علي شاهه ضلعي انتظاميا، پوليس ۽ ريسڪيو ادارن کي هدايت ڪئي ته باهه تي مڪمل طور تي ضابطو اچڻ ۽ صورتحال معمول تي اچڻ تائين بچاءُ ۽ کولنگ آپريشن جاري رکيو وڃي. هن زور ڏنو ته انتظاميا ۽ پوليس کي سڀئي خطرا ختم ٿيڻ تائين واقعي واري هنڌ تي رهي پنهنجون ذميواريون اثرائتي طريقي سان پوريون ڪرڻ گهرجن. وڏي وزير سخت موقف اختيار ڪندي، باهه جي سببن جو نشاندهي ڪرڻ ۽ ان لاپرواهي يا ڪوتاهي جو تعين ڪرڻ لاءِ مڪمل جاچ جو حڪم ڏنو جنهن سبب اهو واقعو پيش آيو. هن هدايت ڪئي ته عمارت ۾ باهه جي حفاظت جي انتظامن جو تفصيلي جائزو وٺي غفلت يا لاپرواهي ڪندڙن خلاف سخت ڪارروائي ڪئي وڃي. وڏي وزير ڪراچي ۾ ڪمرشل عمارتن جي فوري طور تي فائر سيفٽي آڊٽ جو حڪم ڏنو ۽ اختيارين کي هدايت ڪئي ته مستقبل ۾ اهڙن سانحن کي روڪڻ لاءِ فائر سيفٽي قانونن تي سختي سان عمل درآمد کي يقيني بڻايو وڃي. مراد علي شاهه عوامي حفاظتي قدمن تي زور ڏيندي چيو ته سڀني ادارن کي شهرين جي جان ۽ مال جي حفاظت لاءِ هر وقت الرٽ ۽ تيار رهڻ گهرجي. هن ورجايو ته سنڌ حڪومت ڪڏهن به ڪاروباري برادري کي اڪيلو نه ڇڏيو آهي ۽ اڃا تائين انهن سان گڏ بيٺل آهي، هن وڌيڪ چيو ته هن افسوسناڪ واقعي ۾ قيمتي جانين جي نقصان تي کيس تمام گهڻو ڏک ٿيو آهي.