سنڌ جي وڏي وزيرِ جي نئين آءِ جي پوليس سان ملاقات، ڏوهن ۽ اسٽريٽ ڪرائم خلاف سخت ڪارروائي جي هدايت

ڪراچي (پهريون جنوري): سنڌ جي وڏي وزير سيد مراد علي شاهه اربع ڏينهن وزيراعليٰ هائوس ۾ سنڌ جي نئين مقرر ٿيل انسپيڪٽر جنرل پوليس (آءِ جي) جاويد عالم اوڍو سان ملاقات ڪئي ۽ صوبائي پوليس فورس جو چارج سنڀالڻ تي کيس نيڪ تمنائن جو اظهار ڪيو. سروسز اينڊ جنرل ايڊمنسٽريشن ڊپارٽمينٽ سنڌ جي وڏي وزير سيد مراد علي شاهه جي منظوري سان اڄ پهريون جنوري 2026 تي جاويد عالم اوڍو جي مقرري جو نوٽيفڪيشن جاري ڪيو. الله بخش المعروف جاويد عالم اوڍو 1994 ۾ پوليس سروس آف پاڪستان ۾ شامل ٿيو. هو صوبي جي ستن ضلعن ۾ ايس ايس پي/ڊي پي او طور خدمتون سرانجام ڏئي چڪو آهي ۽ پوليس ٽريننگ ڪاليج سعيد آباد، ڪراچي جو پرنسپل پڻ رهيو آهي. کيس 2012 ۾ ڊي آءِ جي جي عهدي تي ترقي ڏني وئي ۽ هن سکر، لاڙڪاڻو، ميرپورخاص، حيدرآباد، ويسٽ ۽ سائوٿ سميت مختلف زونن ۾ خدمتون سرانجام ڏنيون. 2021 ۾ کيس ايڊيشنل انسپيڪٽر جنرل (ايڊيشنل آءِ جي)، بي پي ايس-21 ۾ ترقي ملي ۽ هو ٻه ڀيرا ايڊيشنل آءِ جي پوليس ڪراچي طور به خدمتون انجام ڏئي چڪو آهي. جاويد اوڍو ٻين صوبن ۾ به مختلف ذميواريون نڀايون آهن ۽ گڏيل قومن جي مشن ڪوسوو ۾ پڻ شرڪت ڪئي آهي. هو هڪ سنجيده ۽ سٺي شهرت رکندڙ آفيسر طور سڃاتو وڃي ٿو. ملاقات دوران وڏي وزير مراد علي شاهه پوليس قيادت کي ڪراچي ۾ اسٽريٽ ڪرائم جي خاتمي لاءِ ڪوششون وڌيڪ تيز ڪرڻ جي هدايت ڪئي ۽ چيو ته هي مسئلو سڌي طرح عوام جي اعتماد ۽ شهرين جي تحفظ جي احساس تي اثرانداز ٿئي ٿو. وڏي وزير نئين آءِ جي پوليس کي صوبي ۾ امن امان جي بحالي کي اولين ترجيح ڏيڻ جي هدايت ڪئي. هن زور ڏنو ته ڪچي وارن علائقن ۾ ڏوهاري عنصرن خلاف آپريشن مڪمل طاقت سان ۽ بنا ڪنهن وقفي جي جاري رهڻ گهرجي. سنڌ پوليس جي عوام دوست ساک بحال ڪرڻ جي ضرورت تي زور ڏيندي وڏي وزير سروس ڊليوري بهتر بڻائڻ ۽ پوليس ۽ عوام جي وچ ۾ اعتماد مضبوط ڪرڻ لاءِ ٺوس قدمن جي هدايت ڪئي. هن پوليس فورس کي جديد بڻائڻ (ماڊرنائيزيشن) واري مشن کي ڀرپور انداز ۾ اڳتي وڌائڻ تي پڻ زور ڏنو. مراد علي شاهه سيف سٽي پروجيڪٽ کي وڌيڪ اثرائتو بڻائڻ لاءِ نگراني جي نظام، ٽيڪنالاجي جي بهتر انضمام ۽ آپريشنل ڪارڪردگي ۾ بهتري جي اهميت تي زور ڏنو. هن صوبي ۾ منشيات جي استعمال ۽ اسمگلنگ جي روڪٿام لاءِ منشيات خلاف جاري ڪارروائين کي وڌيڪ تيز ڪرڻ جي به هدايت ڪئي. وڏي وزير چيو ته سنڌ حڪومت پوليس فورس جي بهتري لاءِ جامع قدم کڻي رهي آهي پر پوليس کي به عملي ۽ نمايان نتيجا ڏيکارڻا پوندا. هن نئين آءِ جي پوليس تي زور ڏنو ته قانون لاڳو ڪرڻ ۽ ڏوهن تي ضابطو آڻڻ ۾ واضع بهتري يقيني بڻائي وڃي. آءِ جي پوليس جاويد عالم اوڍو وڏي وزير جو شڪريو ادا ڪيو ۽ حڪومت جي هدايتن تي مڪمل عملدرآمد ۽ سنڌ ڀر ۾ امن امان مضبوط ڪرڻ لاءِ ڀرپور عزم جو اظهار ڪيو۔