یومِ آزادی "معرکۂ حق" کے عنوان سے منانے کا فیصلہ

یومِ آزادی "معرکۂ حق" کے عنوان سے منانے کا فیصلہ

کراچی (2 اگست): وزیراعلیٰ سندھ سید مراد علی شاہ کی صدارت میں یومِ آزادی کی تقریبات کے حوالے سے ایک اہم اجلاس منعقد ہوا جس میں میڈیا، سول سوسائٹی، شوبز، کھیلوں، صحافت اور قومی کھلاڑیوں کے نمائندوں نے شرکت کی۔ اجلاس کا مرکزی موضوع "معرکۂ حق" رکھا گیا تھا۔ اجلاس میں صوبائی وزراء شرجیل انعام میمن، سید ناصر حسین شاہ، سعید غنی، ذوالفقار شاہ سمیت وزیراعلیٰ سندھ کے سیکریٹری رحیم شیخ، سیکریٹری جنرل ایڈمنسٹریشن محمد علی کھوسو، سیکریٹری اطلاعات، اور سیکریٹری ثقافت خیر محمد بھی شریک تھے۔ اجلاس میں شرکت کرنے والی نمایاں شخصیات میں فیصل ایدھی، جہانگیر خان، معین خان، سینئر اداکار مصطفیٰ قریشی، منور سعید، احمد شاہ، سینئر صحافی غازی صلاح الدین، اور قومی کھلاڑی یونس خان اور نسیم حمید شامل تھے، جو یومِ آزادی کی تقریبات کے لیے ایک متحدہ محاذ کی علامت تھے۔ وزیراعلیٰ مراد علی شاہ نے اپنے خطاب میں کہا کہ اس سال کی تقریبات صرف جشنِ آزادی منانے تک محدود نہیں بلکہ ظلم کے خلاف ایک تاریخی فتح کی یاد بھی ہیں۔ انہوں نے زور دیا کہ مختلف مکاتبِ فکر سے تعلق رکھنے والے تمام دانشور ان تقریبات میں بھرپور حصہ لیں۔ انہوں نے بتایا کہ وہ پہلے ہی مختلف مذاہب کے علمائے کرام اور رہنماؤں سے آزادی کی اہمیت کے حوالے سے بات چیت کر چکے ہیں۔ معروف شخصیات کو مدعو کرنے کا مقصد ان کی آراء حاصل کرنا اور ان کی شمولیت کو یقینی بنانا ہے۔

اجلاس میں سینئر وزیر شرجیل میمن نے آگاہ کیا کہ سندھ حکومت نے یکم اگست سے یومِ آزادی کی تقریبات کا باقاعدہ آغاز کر دیا ہے اور اس سلسلے میں 162 مختلف تقاریب بشمول کھیل، ثقافت، موسیقی اور دیگر سرگرمیاں منعقد کی جائیں گی۔ تمام شریک کھلاڑیوں، فنکاروں اور صحافیوں نے ان تقریبات میں بھرپور شرکت کی یقین دہانی کرائی اور وزیراعلیٰ سندھ کو بھرپور اور رنگا رنگ تقریبات کے منصوبے پر مبارکباد دی۔