وزیراعلیٰ سندھ کا ’’گرینڈ فیسٹیول فار اسپیشل چلڈرن‘‘ سے پرجوش خطاب

وزیراعلیٰ سندھ کا ’’گرینڈ فیسٹیول فار اسپیشل چلڈرن‘‘ سے پرجوش خطاب

کراچی (13 اگست) وزیر اعلیٰ سندھ سید مراد علی شاہ نے اعلان کیا ہے کہ صوبائی حکومت معذور افراد کے لیے جامع تعلیم کو مزید فروغ دے گی، قابل رسائی اسکولوں اور خصوصی مراکز کے نیٹ ورک کو وسعت دے گی، عوامی مقامات اور ٹرانسپورٹ سہولیات کو مزید آسان بنائے گی اور صحت، ٹیکنالوجی اور روزگار کے مواقع میں اضافہ کرے گی۔

انہوں نے یہ بات بدھ کو کلِفٹن کے النور پارک میں محکمہ خصوصی تعلیم و بحالی (ڈی ای پی ڈی) کے زیر اہتمام ’’گرینڈ فیسٹیول فار اسپیشل چلڈرن‘‘ سے پرجوش خطاب کرتے ہوئے کہی۔ اس موقع پر صوبائی وزرا ذوالفقار شاہ، ریاض شاہ شیرازی، سینیٹر وقار مہدی، سیکریٹری ڈی ای پی ڈی طٰحہ فاروقی، معاون خصوصی سلیم بلوچ، صوبائی سیکریٹریز فیاض جتوئی، سہیل قریشی، خیر محمد اور دیگر حکام موجود تھے۔

وزیر اعلیٰ نے خصوصی بچوں کی مسکراہٹوں اور رنگین ماحول کو ’’دل موہ لینے والا‘‘ قرار دیتے ہوئے کہا کہ یہ بچے ’’سندھ کے درخشاں ستارے اور لامتناہی جذبے کا سرچشمہ‘‘ ہیں۔ انہوں نے کہا کہ یہ فیسٹیول صوبے کے شمولیت، مساوات اور ہر فرد کے احترام کے عزم کی علامت ہے۔ ان کا کہنا تھا: ’’یہ صرف ایک تقریب نہیں بلکہ سندھ کے عزم کا اعلان ہے۔‘‘ انہوں نے مزید کہا کہ 1973 کا آئین، جو شہید ذوالفقار علی بھٹو کے وژن کا نتیجہ ہے، تمام شہریوں کے لیے مساوات اور فلاح کی ضمانت دیتا ہے۔

مراد علی شاہ نے آئین کے آرٹیکل 25 اور 38 کو معذور افراد کے حقوق کا محافظ قرار دیتے ہوئے ریاست کی ذمہ داری دہرائی کہ وہ ان کی فلاح و بہبود کو یقینی بنائے۔ انہوں نے کہا کہ معذوری کوئی رکاوٹ نہیں بلکہ انسانیت کی تنوع کا قیمتی پہلو ہے اور خصوصی بچوں اور ان کے خاندانوں کی ثابت قدمی، صبر اور صلاحیتوں کو سراہا۔

وزیر اعلیٰ نے ڈی ای پی ڈی، این جی اوز اور محکمہ برائے خصوصی افراد کی کاوشوں کی تعریف کی جنہوں نے فیسٹیول کا انعقاد کیا جس میں خصوصی بچوں کی صلاحیتوں اور مہارتوں کے 87 اسٹالز لگائے گئے تھے۔

انہوں نے اس تقریب کی روح کو یوم آزادی کی تقریبات سے جوڑتے ہوئے کہا کہ ہم نے بھارت کو ایک ایسی شکست دی جس نے ہماری آزادی کا جذبہ دوبارہ تازہ کر دیا اور ہم نے 14 دن یوم آزادی منانے کا فیصلہ کیا ہے۔ کل میں مزارِ قائد پر حاضری دوں گا۔ مراد شاہ نے عزم ظاہر کیا کہ حکومت صوبے کے عوام کی خدمت جاری رکھے گی، تمام شہریوں کو بلا امتیاز برابر مواقع فراہم کرے گی اور قائداعظم کے خواب کو پاکستان کے ہر بچے اور فرد کے لیے حقیقت میں بدلے گی۔

اس سے قبل وزیر اعلیٰ نے مختلف این جی اوز کے اسٹالز کا دورہ کیا جو خصوصی بچوں کی فلاح کے لیے کام کر رہی ہیں۔ انہوں نے خصوصی بچوں سے ملاقات کی، ان کے تیار کردہ کھانے سے لطف اٹھایا اور ان کے ساتھ وقت گزارا، انہیں گلے لگایا، ان کا خیال رکھا اور ان کے ساتھ سیلفیاں بنائیں۔