وزیراعلیٰ سندھ نے بارشوں کے دوران متعلقہ اداروں کو الرٹ کردیا

وزیراعلیٰ سندھ نے بارشوں کے دوران متعلقہ اداروں کو الرٹ کردیا

کراچی (19 اگست) وزیراعلیٰ سندھ سید مراد علی شاہ نے ہدایت دی ہے کہ خطے میں جاری بھاری مون سون بارشوں کے پیش نظر تمام متعلقہ ادارے ہمہ وقت ہائی الرٹ رہیں۔

وزیراعلیٰ نے بارشوں کے دوران قیمتی جانوں کے ضیاع پر گہرے دکھ کا اظہار کرتے ہوئے نالوں اور برساتی ندی نالوں کی سخت نگرانی کی ہدایت کی تاکہ شہری علاقوں میں پانی جمع نہ ہو سکے۔ انہوں نے کہا کہ بارش کا پانی فوری طور پر نکالنے کے لیے تمام ضروری مشینری اور عملہ ہمہ وقت تیار رکھا جائے۔ وزیراعلیٰ نے میئر کراچی کو خصوصی طور پر ہدایت دی کہ تمام مشینری مکمل طور پر فعال ہو اور عملہ فوری کارروائی کے لیے متحرک رکھا جائے۔

شدید موسمی حالات کے پیش نظر عوام کو غیر ضروری سفر سے گریز کرنے کا مشورہ دیا گیا ہے۔ وزیراعلیٰ نے زور دیا کہ ضلعی انتظامیہ، پولیس اور بلدیاتی اداروں کے درمیان ہم آہنگی ہر وقت برقرار رکھی جائے۔ انہوں نے ٹریفک پولیس کو بھی ہدایت دی کہ نشیبی اور زیادہ رش والے علاقوں میں چوکس رہتے ہوئے عوام کی رہنمائی کریں جبکہ شہریوں کو بجلی کے کھمبوں اور کمزور ڈھانچوں سے دور رہنے کی ہدایت کی۔

وزیراعلیٰ سید مراد علی شاہ کے مطابق موسم کی صورتحال سے عوام کو بروقت آگاہ رکھنے کے لیے مانیٹرنگ سسٹم کو مزید بہتر بنایا گیا ہے۔