ڪراچي دنيا جي آجيان ڪندڙ شهر آهي: مراد علي شاهه، ورلڊ ڪلچر فيسٽيول ۾ 142 ملڪن جي فنڪارن کي ڀليڪار

Posted on: 02 Nov 2025 Tags:

ڪراچي (31 آڪٽوبر): سنڌ جي وڏي وزير سيد مراد علي شاهه آرٽس ڪائونسل آف پاڪستان ۾ منعقده ٻئي ورلڊ ڪلچر فيسٽيول جي افتتاحي تقريب کي خطاب ڪندي چيو ته ڪراچي پاڪستان جي دل وانگر ڌڙڪندڙ ۽ زندگي سان ڀرپور شهر آهي۔ هن چيو ته ڪراچي هڪ غير متوقع، متحرڪ ۽ زنده شهر آهي جيڪو هميشه پاڪستان جي روح رهيو آهي ۽ اڄ اهو سڄي دنيا جي آجيان ڪري رهيو آهي۔ آرٽس ڪائونسل ۾ فيسٽيول جو آغاز شاندار نموني سان ٿيو جنهن اداري جي حيثيت کي ثقافتي تنوع ۽ فنون جي اظهار جي مرڪز طور وڌيڪ مضبوط ڪيو۔ افتتاحي تقريب ۾ آرٽس ڪائونسل جي صدر احمد شاهه، صوبائي وزيرِ ثقافت سيد ذوالفقار علي شاهه، اهم شخصيتون ۽ بين الاقوامي مهمان شرڪت ڪئي۔ پنهنجي خطاب ۾ وڏي وزير احمد شاهه جي تعريف ڪندي چيو ته هن هڪ خيال کي عالمي سطح جي ايونٽ ۾ تبديل ڪري ڇڏيو آهي۔ هن چيو ته جيڪو فيسٽيول گذريل سال 44 ملڪن جي فنڪارن سان هڪ جرئت ڀريو تجربو طور شروع ٿيو هو اهو اڄ 142 ملڪن ۽ هڪ هزار کان وڌيڪ فنڪارن جي نمائندگي ڪندڙ بين الاقوامي ميلو بڻجي چڪو آهي جيڪو پاڪستان جي ثقافتي رابطن جي واڌاري جي عزم جي علامت آهي۔ سيد مراد علي شاهه زور ڏنو ته فن ۾ اها طاقت آهي جيڪا اختلاف، تڪرار ۽ ورهاست جي دور ۾ به ٻڌيءَ، شفا ۽ مزاحمت پيدا ڪري سگهي ٿي۔ هن چيو ته هي فيسٽيول انسانيت جي هڪ گڏيل زبان آهي۔ ان موقعي تي سنڌ جي ثقافتي وراثت کي اجاڳر ڪيو ويو جنهن ۾ شاهه عبداللطيف ڀٽائي جهڙن صوفي شاعرن کي خراجِ عقيدت پيش ڪيو ويو ۽ روايتي صوفي موسيقي پڻ پيش ڪئي وئي۔ وڏي وزير چيو ته حڪومت فنون لطيفه جي ترويج کي پاڪستان جي غير عسڪري طاقت (Soft Power) طور اڳتي وڌائڻ لاءِ پرعزم آهي۔ هن صوبائي وزيرِ ثقافت سيد ذوالفقار علي شاهه جو پڻ شڪريو ادا ڪيو ته هن نوجوان فنڪارن کي بااختيار بڻائڻ ۾ سرگرم ڪردار ادا ڪيو۔ فيسٽيول ۾ مختلف پروگرام شامل آهن جن ۾ فلمون، ٿيٽر، موسيقي، ۽ بصري فنون جون نمائشون پڻ شامل آهن۔ بين الاقوامي مهمانن جي موجودگي تي ڳالهائيندي وڏي وزير چيو ته انهن جي شرڪت اها ڳالهه واضح ڪري ٿي ته ڪراچي هڪ مهان نواز شهر آهي، جتي دنيا پاڻ کي پنهنجي گهر جهڙو محسوس ڪري ٿي۔ هي فيسٽيول هڪ مهيني کان وڌيڪ عرصي تائين جاري رهندو جنهن ۾ دنيا جي مختلف ملڪن مان هزارين ماڻهو ۽ فنڪار شرڪت ڪندا جنهن سان پاڪستان جي تخليقي ۽ باحوصلہ قوم جي سڃاڻپ وڌيڪ مضبوط ٿيندي۔ تقريب جو آغاز ٿيم سانگ ۽ 2024 جي ورلڊ ڪلچر فيسٽيول جي جھلڪين سان ٿيو۔ آرٽس ڪائونسل جي صدر احمد شاهه وڏي وزير ۽ مهمانن جو ڀليڪار ڪيو۔ موسيقي جي مظاهرن ۾ شاهه جو فقير (پاڪستان)، مدن گوپال (نيپال)، لوسي ٽاسڪر (بيلجيم)، عمار اشڪر (شام)، اڪبر خميسو خان (پاڪستان) ۽ زڪريا حفار (فرانس) شامل هئا۔ ماحوليات تي ٻڌل مختصر فلم Love Note to an Island (ڪيريباتي) پڻ ڏيکاري وئي۔

Back