سنڌ ۽ وفاقي حڪومتن پاران ڪراچي جي ساحلي مسئلن کي حل ڪرڻ لاءِ گڏيل منصوبي جو اعلان

سنڌ ۽ وفاقي حڪومتن پاران ڪراچي جي ساحلي مسئلن کي حل ڪرڻ لاءِ گڏيل منصوبي جو اعلان

ڪراچي (29 مئي): ڪراچي جي سامونڊي ۽ ماحولياتي مسئلن جي حل لاءِ سنڌ حڪومت ۽ سامونڊي معاملن جي وفاقي وزارت گڏجي ڪيترن ئي اهم منصوبن تي ڪم ڪرڻ جو عزم ظاهر ڪيو آهي جنهن ۾ نيڪال نظام جي بهتري کان وٺي سامونڊي ترقي جي منصوبن تائين شامل آهن. وڏي وزير سيد مراد علي شاهه ۽ سامونڊي معاملن بابت وفاقي وزير جنيد انور خميس ڏينهن وزيراعليٰ هائوس ۾ ملاقات ڪئي جنهن ۾ شهر جي انفراسٽرڪچر جي بهتري ۽ سامونڊي وسيلن جي تحفظ لاءِ نئين دور جي تعاون جو آغاز ڪيو ويو. اعليٰ سطحي اجلاس ۾ صوبائي وزيرن شرجيل ميمڻ، ناصر شاهه، محمد علي ملڪاڻي، ماحوليات بابت صلاحڪار دوست محمد راهمون، ميئر ڪراچي مرتضيٰ وهاب، چيف سيڪريٽري آصف حيدر شاهه، پرنسپل سيڪريٽري آغا واصف، چيئرمين پي اينڊ ڊي نجم شاهه، سيڪريٽري لائيو اسٽاڪ قاظم جتوئي، سيڪريٽري ماحوليات آغا شهنواز ۽ ٻيا شامل هئا. وفاقي سطح تي پارلياماني سيڪريٽري بحري امور ڊاڪٽر درشن پنشي، ڊائريڪٽر جنرل پورٽس اينڊ شپنگ عاليه شاهد، سيڪريٽري بورڊ آف انويسٽمينٽ ڊاڪٽر عارف اقبال، چيئرمين پورٽ قاسم ريئر ايڊمرل (ر) معظم الياس، جنرل مينيجر ڪراچي پورٽ ٽرسٽ عتيق الرحمان ۽ ٻيا آفيسر موجود هئا. وڏي وزير مراد علي شاهه سنڌ حڪومت پاران وفاقي وزارت بحري معاملن سان مڪمل تعاون جي خاطري ڪرائيندي چيو ته ترقياتي منصوبن جي مڪمل ٿيڻ لاءِ گڏيل ڪوششن جي ضرورت آهي. نيڪال آب جو بحران: وڏي وزير زور ڏنو ته ڪراچي ۾ گندي پاڻي کي سمنڊ ۾ ڇوڙ ٿيڻ کان روڪڻ لاءِ نيڪال منصوبن جي تيزي سان مڪمل ڪرڻ ضروري آهي. هن وفاقي وزارت سان هر منصوبي تي تعاون جي آڇ ڪئي ته جيئن عوام کي وڌ کان وڌ فائدو ملي سگهي. وفاقي وزير جنيد انور چيو ته سنڌ حڪومت سان شراڪتداري ۾ شروع ٿيندڙ منصوبا صوبي ۽ ان جي ماڻهن لاءِ اهم فائدا وٺي ايندا. ٻنهي حڪومتن ڪراچي جي سامونڊي ترقي کي هٿي وٺرائڻ لاءِ گڏجي ڪم ڪرڻ جي اهميت تي اتفاق ڪيو. ڪراچي ڪوسٽل ڊولپمينٽ زون (KCCDZ): چائنا روڊ اينڊ برج ڪارپوريشن (CRBC) وڏي وزير کي KCCDZ منصوبي تي بريفنگ ڏني جيڪو وفاقي حڪومت سان موجوده MoU تحت گڏيل منصوبا آهي. هي منصوبو 3.1 ارب ڊالر جي لاڳت سان مڇر ڪالوني ڀرسان زمين حاصل ڪري ڪاروباري زون، هاءِ ٽيڪ ناليج پارڪ، نئين صنعتي شهر، ڪروز ٽرمينل ۽ ڊيسالينيشن پلانٽ تعمير ڪرڻ تي مشتمل آهي. وڏي وزير چيو ته هي منصوبو ڪنهن به انساني آبادي تي اثرانداز نه ٿيندو. منصوبي سان وڏي پيماني تي روزگار جا موقعا پيدا ٿيندا جنهن جي فزيبلٽي اسٽڊي مڪمل ٿي چڪي آهي ۽ منصوبو ٽن مرحلن ۾ 687 ايڪڙ تي مڪمل ٿيندو. هڪ ڪميٽي جنهن ۾ صوبائي وزير سيد ناصر شاهه، ميئر ڪراچي مرتضيٰ وهاب ۽ ڪمشنر ڪراچي حسن نقوي شامل آهن، KPT ۽ سنڌ حڪومت زمين سان لاڳاپيل مسئلا حل ڪندي. وفاقي وزارت بحري امور جلد پنهنجي نمائندن کي مقرر ڪندي. نيڪال نظام جي بهتري: وڏي وزير مراد علي شاهه چيو ته سنڌ حڪومت CRBC جي تعاون سان TP-3 ٽريٽمينٽ پلانٽ لڳائي رهي آهي جڏهن ته روزاني 50 هزار گيلن پاڻي جي گنجائش جو ڊيسالينيشن پلانٽ به قائم ڪيو ويندو. گريٽر ڪراچي سيوريج پلان (STP-III) کي تيزي سان مڪمل ڪيو پيو وڃي ته جيئن لياري ۽ ملير ندي ذريعي سمنڊ ۾ داخل ٿيندڙ گندو پاڻي روڪي سگهجي. TP-1 ۽ TP-2 جي گنجائش کي ترتيب وار 100 ايم جي ڊي ۽ 180 ايم جي ڊي تائين وڌايو ويندو جڏهن ته ملير ندي بيسن مان پاڻي صاف ڪرڻ لاءِ نئين ٽريٽمينٽ پلانٽ (TP-4) 180 ايم جي ڊي جي گنجائش سان ڪورنگي ۾ قائم ڪيو ويندو. ماحولياتي سياحت جي منصوبي تي پڻ غور ڪيو ويو جنهن تحت ڪراچي جي مينگرووز علائقن ۾ ٻيڙين ذريعي سياحتي ٽور متعارف ڪرايا ويندا. ٽرڪ اسٽينڊ: شهر مان ٽرڪ اسٽينڊ منتقل ڪرڻ جي ذميواري ايڊووڪيٽ جنرل سنڌ ۽ ڪمشنر ڪراچي جي سربراهي ۾ قائم ڪميٽي کي سونپي وئي آهي. هن ڪميٽي ۾ KPT جا نمائندا به شامل هوندا جيڪي ٽرڪ اسٽينڊ لاءِ نئون هنڌ تجويز ڪري وڏي وزير کان منظوري وٺندا. هي ملاقات وفاق ۽ صوبائي حڪومت ۾ تعاون کي وڌيڪ مضبوط ڪرڻ ڏانهن اهم قدم آهي جنهن سان ڪراچي ۽ سنڌ لاءِ بھترين بنيادي ڍانچو، مضبوط ماحولياتي تحفظ ۽ اهم اقتصادي ترقي جو امڪان آهي. نيڪال ۽ سامونڊي ترقي جهڙن اهم مسئلن جي حل لاءِ گڏيل عزم خوشحال ۽ پائيدار مستقبل جي نويد آهي.